Arabak eta Gasteizek Madrilgo eta Bartzelonako erdialdera eramango dute turismo eskaintza kamioi tematizatu baten bidez - prentsa

Gasteiz, 2024ko martxoaren 4a.- Arabako Foru Aldundiak eta Gasteizko Udalak beren eskaintza turistikoa ezagutaraziko dute aste honetan Madrilgo, Bartzelonako eta Zaragozako erdialdean. Horretarako, lurraldearen natura, ondare eta enogastronomia ondarearen irudi ikusgarriak erakutsiko dituen autobus tematizatu bat erabiliko dute. Ibilgailu horrek Bilbo eta Donostia bisitatuko ditu aurrerago, sustapena egiteko eta hurbileko turismo baten bila dabiltzan bidaiariak erakartzeko.

Cristina González Enplegu, Merkataritza eta Turismo Sustapenaren Saileko diputatuak eta María Nanclares Enplegu, Merkataritza eta Turismo Sustapenaren Saileko zinegotziak azaldu dute kanpaina horren edukia dela “azken publikoa liluratzea, zuzenean ezagutzera emanda gure naturaren, ondareren eta enogastronomia ezagunaren eskaintza. Bisita gaitzaten limurtuko ditugu, eta bidaia agentziei, touroperadoreei eta prentsa espezializatuari helmuga aurkezteko aukera ere aprobetxatuko dugu".

Turismo bulego ibiltari hori Madrilgo Las Ventas zezen plazaren kanpoko aparkalekuan egongo da gaur eta bihar, asteartea; asteazkenean eta ostegunean irekiko ditu ateak, martxoaren 6an eta 7an, Garaipenaren Arkuaren eta Ziudadelako parkearen ondoan, Bartzelonan; eta egun bat geroago, martxoaren 8an, ostirala, Zaragozako Jose Antonio Labordeta parkean egongo da.

Autobusaren atoia da kanpainaren elementu nagusia, eta Arabako baliabide nagusietako batzuen irudi ikusgarrien biniloak ditu jarrita: Santa Maria katedrala, Gasteizko harresia, Gatz Harana, Gorbeiako Parke Naturala, Arabako Errioxa, Nerbioiko ur jauzia, Erdi Aroko hiribilduak (Urizaharra, adibidez), Arabako gastronomia ezaguna eta zenbait ekitaldi, hala nola Andra Maria Zuriaren jaiak eta Jazzaldia.

Atoiaren barruko espazioa handitu egin daiteke aparkatu ondoren, segundo batzuetan eta sistema hidrauliko baten bidez, eta prestatuta dago komunikabideei eta bidaia agentziei helmugaren aurkezpena egiteko eta bilerak egiteko.

Turismo informazioko gunea

Kamioiaren ondoan, turismoa sustatzeko gune bat jarriko da kanpoaldean, azken publikoari zuzendua, eta bertan probintzia ezagutzeko eta gozatzeko proposamenei buruzko informazioa emango da: Arabako iragan industrialaren ibilbidea, Araban zehar autokarabanaz, motoz eta garraio publikoz ibiltzeko planak; TOP esperientziak Araban; Arabako dorreak eta gazteluak; enoturismoa; Gatz Harana; Erdi Aroko ibilbideak; Galtzeko ibilbideak; Ibilbide berdeak; Turismo irisgarria …"

Cristina Gonzálezek azpimarratu du merkatu nazionala "turismoaren eragile nagusia dela oraindik Araban, eta, hain zuzen ere, 2023an Araba bisitatu zutenen % 70 espainiarrak izan zirela. Madril eta Katalunia dira gure lurraldera bidaiariak gehien bidaltzen dituzten bi autonomia erkidego nagusiak, eta hemen egon nahi dugu jende asko Aste Santuko eta udako oporrak planifikatzen ari den egun hauetan".

"Bisitari nazional horiek fidelizatu nahi ditugu, eta, aldi berean, bidaiari berriak erakarri, Araba ezagutu eta goza dezaten", gaineratu du.

María Nanclaresek, bestalde, Foru Aldundiaren eta Udalaren "koordinazioa eta elkarlana" nabarmendu ditu, "gure erakargarri turistikoak ezagutarazteko, elkarrekin indartsuagoak, eraginkorragoak eta efizienteagoak baikara baliabide publikoak erabiltzean". Langraizek azpimarratu duenez, "Madrilen, Bartzelonan eta Zaragozan izango dugun egonaldian gure helmuga  hiri horietako bidaia agentziei, touroperadoreei eta prentsari aurkezteko aprobetxatuko dugu".

Aurkezpen horiek ibilgailuaren barruan egingo dira, eta Arabako produktuen dastaketarekin batera egingo dira.

Gainera, foru diputatuak eta zinegotziak bilerak egingo dituzte Bartzelonako Udaleko Merkataritza eta Turismo arloko arduradunekin.

Kanpaina ibiltari hori udaberrian izango da Bilbon eta Donostian, eta jarraipena emango dio 2023an Espainiako hainbat hiritan (Santiago de Compostela, A Coruña, Oviedo, Sevilla, Malaga eta Cadiz) zehar ibili zen autobus tematizatu baten bidez egindakoari. Gainera, urtearen bigarren zatian, Europako merkatu estrategikoetan sustapen ekintzak egingo dira.