Foru Aldundiak 60 milioi euro baino gehiago bideratuko ditu mugikortasun jasangarria sustatzeko eta Arabako errepideak modernizatzeko - prentsa

Gasteiz, 2023ko azaroaren 21a.- Mugikortasun Jasangarriaren eta Bide Azpiegituren Sailak 60,6 milioi euro erabiliko ditu 2024an Alavabus eta Eskualdeko Garraioa garatzeko eta hobetzeko, bizikletaren erabilera sustatzeko ibilbide laburreko ohiko joan-etorrietan eta Arabako errepideak modernizatzeko eta mantentze lanak egiteko. Baliabide horiek % 18,4 hazi dira 2023ko aurrekontuekin alderatuta.

Jon Nogales Mugikortasun Jasangarriaren eta Bide Azpiegituren Saileko foru diputatuak zifra horiek eman ditu gaur Arabako Batzar Nagusietan bere sailari dagozkion aurrekontuak aurkezteko egin duen agerraldian, eta azpimarratu du inbertitzaileak direla.

Nogalesek azaldu duenez, aurrekontuek partida eta proiektuetan zehazten dituzte "gure bi lehentasunak: mugikortasun jasangarriko politikei bultzada berri bat ematea, foru garraioa etengabe hobetuz; eta gure errepideen bide segurtasuna indartzea, behar bezala mantenduz eta modernizatuz". Ondoren, bi kudeaketa arloetako partida nagusiak zehaztu ditu.

Hala, Mugikortasunaren arloan, Alavabus eta Eskualdeko Garraio lineak finantzatzera bideratutako partidak nabarmendu ditu (5,2 milioi euro), bai eta beren sistemetan hobekuntza teknologikoak ezartzera bideratutakoak ere. Iragarri duenez, partida horiek "aukera emango dute 2024ko urtarrilaren 1etik aurrera deskontu progresiboko sistema berria abian jartzeko, egungo eredua ordeztuko duen BAT txartel pertsonalizatuan oinarrituta".

Nogalesek baieztatu du sistema berriak Euskadiko Alderdi Sozialistak eta Eusko Alderdi Jeltzaleak Euskadiko garraio publikoko operadore guztientzat itundutako % 20ko hobaria jasoko duela. "Pedro Sánchez gobernuko presidenteak joan den asteazkenean iragarritako hobari neurriak hedatzeko Estatuak ezartzen dituen finantzaketa mekanismoak ere aztertuko ditugu".

"Gure borondate irmoa da Alavabuseko eta Eskualdeko Garraioaren erabiltzaileek Gobernu zentralaren eta gure Autonomia Erkidegoaren artean hitzartzen diren neurri guztiak baliatzea", esan du.

Foru diputatuak jakinarazi du, halaber, kanpaina berezi bat jarriko dela abian, arabarrei laguntzeko BAT txartela pertsonalizatzen. "Arabarrek kosturik gabe pertsonalizatu dezakete beren BAT txartela Gasteizko Antso Jakitunaren kaleko Euskotrenen bulegoetan, baina laster kanpaina bat garatuko dugu bidaiariek deskontuen sistema berriaz baliatu ahal izateko egin beharreko izapide hori errazteko".

Nogalesek azpimarratu duenez, aurrekontuek "2024ra begiratzen dute, epe laburrera, baina baita epe ertain eta luzera ere, plangintza egoki baten bitartez, foru garraioa hobetzen jarraitzeko kontzesio mapa berri baten bitartez, arabarren egungo eta etorkizuneko mugikortasun beharretara, prestazio berrietara eta Alavabus eta eskualdeko garraioko sistema teknologikoen berrikuntzara egokituta".

"606.000 euro erabiliko ditugu helburu horietarako: 262.408 euro foru garraioaren etorkizuna planifikatu eta diseinatzeko, eta 344.000 euro baino gehiago plangintza eta diseinu hori ezartzen hasteko", zehaztu du.

Proiektuak, gainera, 127.000 euro jasotzen ditu Arabako Bizikletaren Estrategia garatzeko, bizikleta ibilbide laburreko ohiko joan-etorrietarako garraiobide gisa erabiltzea sustatzen duten neurrien bidez. Diru kopuru hori Gasteiz eta Arabako Parke Teknologikoaren artean bizikleta bidea eraikitzeko eta Guardia eta Eltziego artean bizikleta bide berri bat idazteko erreserbatutako 1,9 milioi euroko partidari gehitu behar zaio.

Armiñongo lotunea handitzea

Bide Azpiegituren arloan, Foru Errepide Sarearen segurtasuna indartzeko, aurrekontuek bide sarea behar bezala mantentzeko eta kontserbatzeko baliabideak bermatzen dituzte, eta zenbait modernizazio proiektu gauzatzea. Azken horien artean, Armiñongo lotunea handitzeko lanen lehenengo fasea hastea dago bai eta N-124 errepidea Armiñón eta Berantevilla artean bikoizteko eta A-2128 errepidea Kanpezu eta Done Bikendi Harana artean hobetzeko obrak amaitzea ere.

"Gure errepideak egokitzeko, hobetzeko eta kontserbatzeko zenbait proiektutarako esleitutako inbertsioak ia 31 milioi euro dira", adierazi du.

Foru diputatuak partida batzuk nabarmendu ditu, hala nola 8,8 milioi euro kontserbazio kontratuak finantzatzeko; 7 milioi euro A-1 eta AP-1 errepideen arteko lotura handitzeko Armiñonen (Espainiako Gobernuak % 100 finantzatuta); 5,7 milioi euro N-124 errepidea bikoizteko obrekin jarraitzeko eta amaitzeko; eta 5,7 milioi euro A-2128 errepideko obrak amaitzeko eta Legutioko saihesbidea eta Maeztu-Leortzakoa egokitzeko.

Aurrekontuek, gainera, 4,5 milioi euro baino gehiago gordetzen dituzte zoruak berritzeko; 2,8 milioi euro Eztarroako errepidea hobetzen hasteko; 701.134 euro N-240 errepidean Ubideko bidegurutzea handitzeko obrekin jarraitzeko eta amaitzeko (Bizkaiko Foru Aldundiarekin batera finantzatuta); eta 550.000 euro Manzanos eta Pobesko trenbide pasaguneak kentzeko obra eta proiektuetarako (ADIFek % 50ean finantzatuta).

Azkenik, eta azterlan eta proiektuei dagokienez, kontuek 250.000 euro esleitzen dituzte edukiera handiko bideak erabiltzeagatiko ordainketari buruzko azterketarako eta AP-68 autobidearen emakida itzultzeko txostenerako; eta 317.814 euro La Tejerako mendatea eta Gesaltza Añanako saihesbidea hobetzeko proiektua idazteko; eta beste proiektu batzuetarako, hala nola Artziniegako zeharbidea, A-124 errepideko Samaniego-Leza tartea eta Kexaarako sarbideak hobetzea.