Aldundiak BAT txartela pertsonalizatzeko kanpaina ibiltari bati ekingo dio bihar Laudion - prentsa

Gasteiz, 2024ko otsailaren 29a.-Arabako Foru Aldundiko Mugikortasun Jasangarriaren eta Bide Azpiegituren Sailak BAT txartela pertsonalizatzeko guneak gaituko ditu martxoan, apirilean eta maiatzean, lurralde historikoko eskualdeetako hamabi herritan. Kanpaina ibiltari hori martxoaren 1ean, ostirala, hasiko da Laudion, eta hurrengo asteetan kuadrilla guztietatik pasatuko da.

Zehazki, Laudioz gain, Amurrion, Oionen, Guardian, Bastidan, Agurainen, Dulantzin, Langraiz Okan, Ribabellosan, Legution, Murgian eta Santikurutze Kanpezun egongo da.

Jon Nogales Mugikortasun Jasangarriaren eta Bide Azpiegituren Saileko foru diputatuaren esanetan, "Arabarrei izapide hori egiteko erraztasunak eman nahi dizkiegu ekimen horren bidez, eta, horrela, Alavabuseko eta eskualde garraioko txartelean % 72ra arteko hobaria ematen duen deskontu sistema progresiboa erabiltzeko aukera eman". Nogalesek nabarmendu duenez, BAT pertsonalizatuan oinarritutako sistema horrek saritu egiten ditu garraio publikoa gehien erabiltzen duten pertsonak.

"BAT txartel pertsonalizatua dutenek honako deskontu hauek izango dituzte 2024ko urtarrilaren 1etik aurrera: hilean 1-20 bidaia eginez gero, % 62ko deskontua; hilean 21-50 bidaia eginda, % 67ko deskontua, eta hilean 51 bidaia baino gehiago egiten badituzte, % 72ko deskontua", azaldu du Nogalesek.

Foru Aldundiak, sistema berria abian jarri aurretik, BAT txartela pertsonalizatzeko kanpaina bat abiarazi zuen, Gasteizko Autobus Geltokian aldi baterako bulego bat irekiz, foru garraioaren erabiltzaileek izapide hori egin ahal izan dezaten. Bulego hori otsailaren 29ra arte egongo da zabalik, Antso Jakitunaren kaleko tranbiaren bulegoak eman ohi duen zerbitzua osatzeko.

Martxoaren 1etik aurrera, Mugikortasun Jasangarriaren eta Bide Azpiegituren Sailak BAT txartela pertsonalizatzeko kanpainaren bigarren fasea garatuko dugu, eta, horretarako, pertsonalizazio guneak gaituko ditu lurraldeko eskualde guztietako herri nagusietan, izapide hori Arabako bazter guztietara hurbiltzeko eta, horrela, arabar guztiei deskontu progresiboko sistema berria erabili ahal izatea errazteko.

Zehazki, herri hauetan gaituko ditu pertsonalizazio guneak Mugikortasun Jasangarriaren eta Bide Azpiegituren Sailak: Laudio eta Amurrio Aiaran; Oion, Guardia eta Bastida Arabako Errioxan; Agurain eta Dulantzi Arabako Lautadan; Langraiz Oka eta Ribabellosa Añanan; Legutio eta Murgia Gorbeialdean; eta Santikurutze Kanpezu Mendialdean. Eta hau izango da egutegia:

• Laudion (udaletxea): martxoaren 1ean, 4an eta 5ean.

• Amurrion (kultura etxea): martxoaren 7an, 8an eta 11n.

• Oionen (udal zinema): martxoaren 13an, 14an eta 15ean.

• Guardian (gazte zentroa): martxoaren 19an, 20an eta 21ean.

• Bastidan (kultura etxea): martxoaren 25ean, 26an eta 27an.

• Agurainen (udaletxea): apirilaren 3an, 4an eta 5ean.

• Dulantzin (kultura etxea): apirilaren 9an, 10ean eta 11n.

• Langraiz Okan (udal artxiboa), apirilaren 15ean, 16an eta 17an.

• Ribabellosan (Verde gizarte eta kultura etxea): apirilaren 19an, 22an eta 23an.

• Legution (kultura etxea): apirilaren 25ean, 26an eta 30ean.

• Murgian (udaletxea): maiatzaren 2an, 3an eta 6an.

• Santikurutze Kanpezun (kultura etxea): maiatzaren 8an, 9an eta 10ean.

Jendaurreko ordutegia 12:30etik 17:30era izango da herri guztietan, eta BAT txartela pertsonalizatu nahi dutenek hau baino ez dute eraman behar adierazitako arreta guneetara: BAT txartel anonimo bat eta NANa. Pertsonalizazioa doako izapidea da BAT txartel anonimoa izanez gero, eta ez da beharrezkoa argazkirik eramatea, unean bertan atera baitaiteke web kamera bidez.

BAT txartel anonimorik eduki ezean, edo txartela hondatuta badago, beste txartel bat erosi eta egin beharko da. Arreta guneek BAT txartel anonimoak izango dituzte 5 euro ordainduta txartel berriak jaulki ahal izateko, 2 euroko karga barne. Karga handiagoa egiteko aukera ere izango da, txartelagatik 3 euro eta kargaren zenbatekoa ordainduta.

Banku txartel bidez ordaintzea gomendatzen da, datafono bat izango baita. 

Azkenik, norbaitek bere txartela pertsonalizatu nahi badu baina arreta gune ibiltarira joaterik ez badu, beste pertsona baten bitartez egin ahal izango du izapidea, betiere pertsona horrek jatorrizko dokumentua (NAN, AIZ...) eta argazkia eramaten baditu. NAN propiorik ez duten adingabeei dagokienez, BAT txartela tutorearen NANarekin pertsonalizatuko da.

Pertsonalizazio gune ibiltariak BAT txartel pertsonalizatu orokorrak bakarrik emango ditu. Baldintza bereziak betetzea eskatzen dutenak —65 urtetik gorakoentzako Berezi txartelak, familia ugariko txartelak eta beste kolektibo batzuenak— orain arte bezala Gasteizko Antso Jakitunaren kaleko Euskotrenen bulegoan jaulkitzen jarraituko da.