Ramiro Gonzalezek Aiaraldeko Garapen Industrialerako Mahaiaren azken fasea iragarri du, eskualdeko enplegua, inbertsioa eta lehiakortasuna indartzeko - arabapress

Gasteiz, 2026ko ekainaren 11. Arabako diputatu nagusia Ramiro Gonzálezek iragarri du Aiaraldeko Garapen Industrialerako Mahaia azken fasean sartu dela, erakundeen, eragile politikoen, ekonomikoen eta sozialen arteko bederatzi hilabeteko lan bateratuaren ondoren. Helburua da eskualdearen lehiakortasunaren aldeko akordio handi bat lortzea, enplegua sendotzeko, inbertsio berriak erakartzeko eta Aiaraldearen etorkizun industriala indartzeko.

Arabako Ganberaren Nazioartekotze Sarien banaketa ekitaldian egindako hitzaldian, Gonzálezek aurreratu du datorren ekainaren 23an lan-jardunaldi berri bat egingo dela Amurrioko El Reforren, Mahaiaren parte diren pertsona guztiekin, azken hilabeteetan garatutako prozesuaren ondorioak aurkezteko. Topaketa horren ondoren, hausnarketa indibidualerako eta ekarpenak egiteko epe bat irekiko da, dokumentua aberasteko eta ahalik eta adostasun handiena lortzeko, uztailean aurreikusita dagoen ondorio eta konpromiso partekatuen behin betiko aurkezpena baino lehen.

Diputatu nagusiak azaldu duenez, “Mahaiak denbora honetan elkarrizketarako eta hausnarketarako gune bat osatu du, eta bertan erakundeek, eragile politikoek, ekonomikoek eta sozialek parte hartu dute helburu komun batekin: Arabako industriarentzat estrategikoa den eskualde baten oraina eta etorkizun industriala indartzeko oinarriak identifikatzea”.

“Bederatzi hilabeteko lan gogorra eta bizia izan dira, testuinguru konplexu batean, baina baita diagnostikoak partekatzeko, erronkak identifikatzeko eta Aiaraldearentzat etorkizuneko proposamenak lantzeko aukera ere”, adierazi du.

Ramiro Gonzálezek nabarmendu duenez, “prozesu honen ondorioek eskualdeko industria-sarea sendotzera, inbertsioak erakartzera, enplegua sortzera eta lehiakortasuna sustatzera bideratutako ekintza eta ildo zehatzak abiarazteko balio behar dute”. Ildo horretan, “Aiaraldearen industria-lehiakortasunaren aldeko gizarte-itun handi baterantz aurrera egiteko beharra” defendatu du, “elkarrizketan, konfiantzan eta inplikatutako eragile guztien arteko lankidetzan oinarrituta”.

“Aiaraldearen industria-lehiakortasunaren aldeko gizarte-itun handi bat eraiki behar dugu. Elkarrizketa eta konfiantza erdigunean jarriko dituen akordio zabala, beste interes mota batzuen gainetik. Kalitatezko enplegua, inbertsioa, berrikuntza eta egonkortasuna helburu partekatu gisa bermatuko dituen akordioa”, adierazi du.

Diputatu nagusiaren ustez, bereziki garrantzitsua da azken asteotan Tubos Reunidos eta Maderas de Llodio bezalako enpresetan elkarrizketa sozialean aurrerapenak izan izana. “Albiste bikaina da. Hori da bidea”, adierazi du, eta azpimarratu du beharrezkoa dela “konfiantza handiagoko inguruneak sortzea, arazoei aurrea hartzeko eta zailtasunak krisi handiago bihurtu aurretik irtenbideak eraikitzeko”.

Ramiro Gonzálezek defendatu du, halaber, industria lehiakortasunak akordioak lortzeko eta konfiantza sortzeko gaitasuna eskatzen duela. “Lehiakortasuna ez da etengabeko konfrontaziotik eraikitzen. Konfiantzatik, elkarrizketatik eta industria-enplegua mantendu eta sortzeko borondate partekatutik eraikitzen da”, adierazi du.

Arabako agintariak gogorarazi du Aiaraldeak lurraldeko ekonomia eta industriarentzat estrategikoa izaten jarraitzen duela, eta bere enpresen eta eragileen gaitasunean konfiantza agertu du egungo erronkei arrakastaz aurre egiteko. “Ez da inork bere jarrerei uko egitea, baizik eta helburu komun bat partekatzen dugula ulertzea. Gure industriaren etorkizunak denoi egiten digu dei, eta erronka handiei lankidetzatik eta akordiotik bakarrik egin dakieke aurre”, ziurtatu du.

Ramiro Gonzálezek amaitzeko, konfiantzazko mezua helarazi du Arabaren eta Aiaraldearen etorkizun industrialari buruz. “Arabak bere historian zehar askotan erakutsi du aurrera egiten dakiela elkartuta lan egiten duenean. Horregatik, erabateko konfiantza dut gure enpresek eta gure industriak egungo erronkei erantzuten jakingo dutela, Araba industria erreferente den lurralde izaten jarrai dezan eta inbertsio berrientzat erakargarria den espazioa izan dadin”, ondorioztatu du.