Aktibatu Araba aurrera doa Arabako turismoaren eraldaketa digitalerako bidean ehun enpresa inguru sartu baitira - arabapress

Vitoria-Gasteiz, 2026ko abuztuaren 28a.– Aktibatu Araba, Foru Aldundiak sustatzen duen Arabako Turismo Adimendunaren Plataforma, aurrera doa lurraldeko turismo sektorearen eraldaketa digitalerako bidean, proiektuan ehun bat enpresa sartu baitira maiatzaren 14an aurkeztu zenetik. 150 turismo agente inguruk parte hartu dute hilabete hauetan programatutako informazio eta prestakuntza ekintzetan.   

Cristina González lehen diputatu nagusiordea eta Enplegu, Merkataritza, Turismo eta Foru Administrazioaren Saileko foru diputatuaren hitzetan, "balantze horrek erakusten du Arabako turismo sektoreak aktiboki parte hartu nahi duela aurrera egiteko, eraldatzeko eta lankidetzan aritzeko ekimen horretan.  Aktibatu Arabak bultzatzen gaitu kudeaketa turistikoko eredu konektatuago, lehiakorrago eta datuetan oinarrituago baterantz, non enpresek, administrazioek eta entitateek elkarrekin lan egiten dugun lurralderako aukera berriak sortzeko». 

Sektore pribatuaren inplikazioa da Aktibatu Arabaren ardatz nagusietako bat, eta, hain zuzen ere, proiektu horrek oso tresna erabilgarriak jartzen ditu atxikitako enpresen esku, haien produktuak eta zerbitzuak hobeto ikusarazteko, bidaiarien portaerari buruzko benetako datuak eskuratzeko, erabakiak hartzeko, sustapen ekintza bateratuetan parte hartzeko eta prestakuntza espezializatua jasotzeko.

Gainera, erregistratutako enpresek aukera izango dute ibilbide, esperientzia turistiko, kanpaina eta zerbitzu digital berriei lotutako etorkizuneko ekimenetan parte hartzeko, hala nola Green Tourist Card edo Arabako turismo txartel digitala. 

Arabako Foru Aldundiak Aktibatu Araba proiektua aurkeztu zuen maiatzaren 14an, eta hurrengo asteetan saio eta web bidezko mintegi (webinar) espezializatuen ziklo bat jarri zuen abian, turismo kudeaketako enpresa eta langileei zuzenduta, Arabako turismo-sektoreko eragile nagusiak sentsibilizatzeko eta prestatzeko.   Gainera, enpresei lagundu zaie programan behar bezala inskribatzen eta erregistratzen. 

Ekintza horiek, 150 agente ingururen parte hartzearekin, aukera eman dute sektorearen beharrak biltzeko, zalantzak argitzeko eta edukiak eta baliabideak proiektuan parte hartzen duten profil desberdinetara egokitzeko. 

Hilabete hauetako beste aurrerapauso bat Aktibatu Araba Campusa abian jartzea izan da, toki erakundeetako eta turismo enpresetako langileei zuzendutako prestakuntza gunea.  Campus honek web bidezko mintegiei (webinars) jarraipena ematen die, eta edukiak zabaltzeko aukera ematen du ikastaro aurreratuagoen bidez eta ikuspegi praktiko batekin, gai hauei buruz: «Gaitasun digitalak eta enpresa eraldaketa», «Berrikuntza, produktua eta marketin turistikoa» edo «Sareko turismoa: lurralde koordinazioa eta lankidetza». 

Lurraldea aktibatzeko ezagutza eta baliabideak zentralizatzen dituen ataria

Beste mugarrietako bat Aktibatu Araba web orria abian jartzea izan da, proiektuaren erreferentziazko espazio digital gisa.  Atari horrek informazioa, baliabide praktikoak eta profil bakoitzera egokitutako tutorialak biltzen ditu, bai eta Arabako Foru Aldundiak proiektuaren ezarpenaren esparruan eskura jartzen dituen doako soluzio digitalei buruzko gidak ere.   Helburua da informazioa ematea eta Turismo Adimendunaren Plataforma tresna erabilgarri, ulergarri eta egunerokoan aplikagarri bihurtzea.

Ingurune digital berean, Aktibatu Arabak komunikazio hub bat ere integratu du, baliabide grafikoak eta zabalkundekoak zentralizatzen dituena, udalek, turismo bulegoek eta entitate laguntzaileek proiektua ezagutarazi ahal izan dezaten.  Gune honek sare sozialetarako, newsletterretarako, aurkezpenetarako, bannerretarako eta/edo ikus-entzunezko baliabideetarako edukiak batzen ditu, proiektuaren hedapen koordinatua errazteko eta lurralde osoan atxikimendu berriak erakartzen laguntzeko. 

Datozen hilabeteetan proiektura enpresak biltzen jarraituko da, eta tresna berriak aktibatuko dira, bai eta tresna horien erabileran eta aprobetxamenduan laguntzeko behar den prestakuntza eman ere. Parte hartu nahi duten entitateek, negozioek eta enpresek informazio gehiago eskuratu ahal izango dute, eskuragarri dauden baliabideak lortu ahal izango dituzte eta Aktibatu Araba atariaren bidez sartzeko prozesuari ekin ahal izango diote.

Aktibatu Arabari buruz

Aktibatu Araba Arabako Turismo Adimendunaren Plataforma da, Arabako Foru Aldundiak bultzatua, eredu turistiko berritzaileago, jasangarriago, koordinatuago eta datuetan oinarrituago baterantz aurrera egiteko. Bai proiektuaren bai lurraldean hedatzearen helburua da turismo eragileen informazioa, teknologia eta ekosistema konektatzea, helmugaren kudeaketa hobetzeko, enpresen lehiakortasuna indartzeko eta esperientzia turistiko pertsonalizatuagoak eta bidaiarien beharretara egokituagoak eskaintzeko.

Aktibatu Araba proiektuak 1,6 milioi euroko aurrekontua du, eta Europar Batasuneko Next Generation funtsen bidezko % 73ko finantzazioa du, Espainiako Gobernuaren Berreskuratze, Eraldatze eta Erresilientzia Planaren esparruan. Ekimena bat dator, halaber, SEGITTURek sustatutako helmuga turistiko adimendunaren ereduarekin.

Informazio gehiago hemen: https://aktibatu.araba.eus/eu