Arabak bat egin du gizarte berrikuntza euskaratik sustatzeko Fair Saturday mugimenduarekin - arabapress
Arabak bat egin du gizarte berrikuntza euskaratik sustatzeko Fair Saturday mugimenduarekin
Arabako Foru Aldundiak eta Fair Saturday Fundazioak jaialdia antolatuko dute azaroaren 26an, eta 15 ekitaldi baino gehiago izango dira, 27 artista/erakunde, 14 espazio eta 13 gizarte-proiektu barne hartzen dituztenak
Vitoria-Gasteiz, 2022ko azaroaren 18a. Arabako Foru Aldundiak eta Fair Saturday Fundazioak indarrak batu dituzte gizarte berrikuntza euskaratik sustatzeko. Datorren azaroaren 26an, Araban izango da estreinakoz jaialdi honen egoitza, eta 15 ekitaldi baino gehiago izango dira 14 gunetan, Gasteiz, Laudio eta Artziniega artean.
Fair Saturday Fair Saturday Fundazioak 2015ean abiarazitako ekimena da, eta bertatik uste da funtsezko bi elementu daudela gizarte bidezkoagoak eta garatuagoak eraikitzeko: kultura eta enpatia. Mugimendu global gisa definitzen da, eta eragin sozial positiboa sortu nahi du, arte eta kultura jaialdi baten bidez, azaroko azken larunbatero, Black Friday egunaren biharamunean, kontsumismoaren adierazpenik handiena. Mundu osoko artistak eta kultura-erakundeak biltzen dira ekimen global honetan, eta baldintza bakarra betetzen dute: beren aukeraren kausa sozial bat babestea, beren ekitaldiaren bidez.
Hori dela eta, egun berezi honen harira egiten diren ekitaldi guztiek antolatzaileek eurek aukeratutako gizarte-proiektu bati lagunduko diote, guztiek gizarte jasangarri eta bidezkoagoak eraikitzeko egiten duten lana aintzatetsi nahian.
Lexuri Ugarte Arabako Foru Aldundiko Euskara eta Gobernu Irekiko zuzendariak ziurtatu du, “arrakasta izateaz gain, erronka handia dela Arabarentzat euskara eta gizarte berrikuntza uztartzen dituen ekimen bat abian jartzea. Ekimen originala da, eta espero dugu Arabako herritarren babesa izatea”.
2022an, azaroaren 26an, larunbata, ospatuko da Fair Saturday, nazioarteko erakunde eta komunitate ugari bilduz.
Fair Saturday Araba da lurraldeak mugimendu global horri egiten dion ekarpena (Arabako Foru Aldundiarekin lankidetzan), eta zeregin garrantzitsua hartzen du bere gain ekimen zabal horren buruan. Arabarekin batera, aurten ekimenarekin bat egingo duten beste egoitza ofizial batzuk Huelva, Bilbo, Bizkaiko eskualde osoa, Errioxa eta Eskozia dira.
Fair Saturday Araba 2022 ekimenak lurraldean hazi positibo bat erein nahi du, eta dagoeneko 15 ekitaldi baino gehiago ditu, 27 artista/erakunde kultural, 14 espazio eta jaialdirako baieztatutako 13 proiektu sozial barne hartzen dituztenak.
Horien artean nabarmentzekoak dira BLEIBET Ahots Taldea eta Euskadiko Gazte Artritis Idiopatikoaren Elkarteari (AIJ) laguntzeko Nuestra Señora de la Encina Santutegian emandako kontzertua, Laudion Inside Out Kultutlab taldearen babespean antolatutako ekitaldiak eta Oihaneder Euskararen Etxean Arabako Elikagaien Bankuaren alde egingo den Ura Bere Bidean kontzertuaren hiru paseak (360º teknologiarekin eta errealitate birtualarekin). Ekitaldien programa osoa Fair Saturday jaialdiaren webgune ofizialean (https://app.fairsaturday.org /) eta sare sozial ofizialetan kontsulta daiteke.
Gainera, Fair Saturdayren Inaugurazio Ekitaldia dela eta (azaroaren 25ean izango da, Bilbao Arena Miribillan, mugimenduari hasiera emateko), fundazioak Arabako hainbat abesbatza gonbidatu ditu emozioz, sorpresaz eta dibertimenduz betetako gau hau ikustera, datorren urtean 2.000 artista baino gehiagok parte har dezaten, musikaren historiako gai handiak interpretatuz.
Saioa Eibarrek, Fair Saturday Fundazioaren sortzaileak, honakoa gehitu du: "Kulturak garapenerako eta gizarte-kohesiorako, enpatiarako eta berdintasunerako duen balioa aitortzeko aukera dugu. Fair Saturdayn eta, jakina, urteko egun guztietan.