Gazteriaren Foru Erakundeak gazte informatzaileen sare bat sustatzen du Arabako ikastetxeetan - arabapress
Gazteriaren Foru Erakundeak gazte informatzaileen sare bat sustatzen du Arabako ikastetxeetan
Deialdia 15 eta 25 urte bitarteko ikasleei zuzenduta dago, eta ikastetxe bakoitzeko 500 eurora arteko laguntzak aurreikusten ditu; gehienez bederatzi ikastetxe hautatzeko aukera emango du
Eskaerak aurkezteko epea urriaren 31n amaituko da
Vitoria-Gasteiz, 2026ko irailaren 23a. Gazteriaren Foru Erakundeak abian jarri du irakaskuntza ertainetako Arabako ikastetxeetan gazte informatzaileei laguntzeko 2026-2027ko ikasturterako deialdiaren 2. edizioa. Ekimenaren helburua da gazteei beren garapen pertsonalerako interesgarria den informazioa eskuratzen laguntzea eta gazteek informazio hori ikaskideen artean atzematen, antolatzen eta zabaltzen laguntzea.
Deialdia Arabako Lurralde Historikoko Derrigorrezko Bigarren Hezkuntzako –laugarren mailako ikasleentzat–, Batxilergoko eta Oinarrizko, Erdi mailako eta Goi mailako Lanbide Heziketako ikastetxeei zuzenduta dago, Vitoria-Gasteizko ikastetxeei izan ezik, horiek udalaren berariazko deialdia baitute.
Programa 2026ko azarotik 2027ko maiatzera bitartean garatuko da, eta Araban edo Trebiñuko enklabean bizi diren 15 eta 25 urte bitarteko gazteen parte hartzea aurreikusten du. Gazteriaren Foru Erakundearen ustez, onena litzateke zentro bakoitzean bi gazte informatzailek parte hartzea.
Gazteentzako informazioa zentroetatik bertatik
Parte hartzaileak arduratuko dira beren ikastetxearen barruan informazio espazio fisiko eta/edo birtual bat kudeatzeaz, non ikasleentzat interesgarria den informazioa zabalduko duten. Horretarako, Infogaztea Arabako Gazte Informazio eta Dokumentaziorako Lurralde Zentroaren laguntza izango dute. Zentro horrek edukien hautaketa bat erraztuko du hamabostean behin, eta gazteek beraiek beste iturri batzuen bidez jasotako informazioarekin osatuko da.
Gainera, informatzaile gazteek hilean bi bideo labur sortuko dituzte Infogazteako sare sozialetarako. Edukiek gazteentzat interesgarria den informazioa, parte hartzaileen kezka pertsonalak edo ikasleek berek planteatutako gaiak jorratu ahal izango dituzte.
Programak barne hartzen du, halaber, informazioa antolatzeari eta hedatzeari eta ikus-entzunezko edukiak sortzeari buruzko hasierako prestakuntza, bai eta Gazteriaren Foru Erakundearen laguntza eta jarraipena ere funtzionatzen duen aldi osoan.
Ekimenaren helburua da programan parte hartzeak gazteei aukera ematea komunikazioarekin, parte hartzearekin eta pertsonen arteko harremanekin lotutako tresnak garatzeko, eta, aldi berean, eginkizun aktiboa izatea berdinei zuzendutako informazioa zabaltzean.
Deialdiak 4.500 euroko aurrekontua du guztira, eta bederatzi zuzkidura ekonomiko aurreikusten ditu gehienez, 500 eurora artekoak hautatutako ikastetxe bakoitzeko. Zenbateko hori parte hartzen duten gazteentzat izango da, informazio espazioa dinamizatzeko eta Infogazteako sare sozialetarako hilean bi bideo sortzeko lanen kontraprestazio gisa.
Ikastetxe interesdunek 2026ko urriaren 31ra arte aurkeztu ahal izango dituzte eskabideak, egun hori barne, Arabako Foru Aldundiaren egoitza elektronikoaren bidez edo indarrean dagoen araudiaren arabera gaitutako erregistroetan.
Zalantzak argitzeko edo izapideetan laguntza jasotzeko, ikasleak Infogaztearekin harremanetan jar daitezke 945 181700 telefono zenbakian, WhatsApp bidez edo 670 281 700 telefono zenbakira deituta, edo infogaztea@araba.eus. posta elektronikoaren bidez.