Kutxabankek bat egin du Arabako Foru Aldundiak bultzatutako etxebizitza eskuratzeko programarekin - prentsa
Kutxabankek bat egin du Arabako Foru Aldundiak bultzatutako etxebizitza eskuratzeko programarekin
Vitoria-Gasteiz, 2025eko martxoaren 17a. Arabako Foru Aldundiak etxebizitzak erosteko abalen programa indartu du, Kutxabank erakunde laguntzaile gisa gehituta. Finantza-sektorearen atxikimendu horrek bultzada nabarmena ematen dio Arabako gazteei lehen etxebizitza eskuratzeko aukera erraztuko dien ekimen bati, etxebizitzaren balioaren % 80 eta % 95 arteko aldea bermatuz.
Laura Perez Borinaga Lurralde Orekako diputatuak nabarmendu duenez, Kutxabanken sarrerak "kaudimena izan arren etxebizitza lortzeko behar beste aurrezpen sortu ez duten gazteei mailegu batetik eratorritako ordainketei aurre egitea ahalbidetuko du".
Ildo horretan, finantza-erakundeak abalen eta finantzaketaren kudeaketan duen esperientzia emango du, baita kudeaketaren arintasuna ere, kobrantza-bermeak eta Aldundiak eskaintzen dituen zerbitzu gehigarriak osatuz.
Biztanleria eta lurralde-oreka finkatzea
Etxebizitzak erosteko abalen programa Araban eta Trebiñuko Enklabean bizi diren 36 urtetik beherako pertsonentzat da, etenik gabe azken bi urteetan. Abalaren gehieneko iraupena 10 urtekoa da, eta etxebizitzaren erosketa-prezioaren gehieneko zenbatekoa 325.000 eurokoa.
Atxikimendu horrekin, Aldundiak eta Kutxabankek elkarrekin lan egingo dute etxebizitza eskuratzeko aukera sustatzeko, lurraldean biztanleria finkatzen duen eta lurralde-oreka bultzatzen duen ekimen batekin, programa Arabako udalerri guztietara hedatzen baita.