Foru Aldundiak jardunaldi bat antolatu du gizarte zerbitzuetako etika profesionalari eta funtsezko uneetan erabakiak hartzeari buruz - arabapress

Vitoria-Gasteiz, 2025eko urriaren 3a. Arabako Foru Aldundiko Gizarte Politiken Sailak, CEISArekin (Arabako Gizartean Esku Hartzeko Etika Batzordea) lankidetzan, datorren ostegunean, urriak 9, gizarte zerbitzuen etikaren inguruko jardunaldi bat antolatuko du berriz ere, oraingoan erabakiak funtsezko uneetan hartzean eta eguneroko bizitzarako tresna praktikoetan oinarrituta, erabakiak modu kontzienteagoan eta arduratsuagoan hartzen laguntzeko.

Hamalaugarren urtea da Arabako Foru Aldundiko Gizarte Politiken Sailak jardunaldi hori antolatzen duela, eta aurtengo helburua da printzipio etikoak zabaldu eta ezagutaraztea Arabako gizarte zerbitzuetako langileen eta, oro har, herritarren artean, gizarte zerbitzuen arreta eredua pertsonen eta jardunbide egokien inguruan ardazteko.

Hitzaldi nagusia, ‘Funtsezko bizi-uneetan erabakiak nola hartu. Eguneroko bizitzarako tresnak’, Cristina de la Cruz Deustuko Unibertsitateko Pedro Arrupe Giza Eskubideen Institutuko Filosofiako irakasle titular eta ikertzaileak emango du. Hitzaldian, gogoeta ireki eta irisgarri bat proposatuko du erabaki horiei aurre egiteko moduari buruz, bizitzak aldaketa, galera, aukera edo dilema sakonen aurrean jartzen gaituenean, ikuspegi gizatiar, erlazional eta etiko batetik, aitortzen baitu ez dugula hutsean erabakitzen, baizik eta osatzen eta sostengatzen gaituzten loturetatik.

Kultura garaikidean, askotan, erabakiak hartzea ekintza indibidual, arrazional eta autonomo gisa aurkezten zaigu. Baina erabakiak hartzeak emozioak, testuinguruak, istorio partekatuak eta harreman esanguratsuak ere biltzen ditu: loturak —familiakoak, lagunenak, komunitarioak, baita norberarekin ere— ez dira askatasunez erabakitzeko oztopoak, zentzu-, orientazio- eta indar-iturriak baizik.

Cristina de la Cruzek Deustuko Unibertsitatean irakasten du Filosofia Zaharra, Filosofia Morala eta Ikerketaren Etika. Bere argitalpenetan nabarmena da kontzeptu batzuen konplexutasuna aztertzen duela, hala nola erantzukizuna, hausnarketa, errukia edo desberdintasuna. Euskadiko erakunde askorekin lankidetzan aritzen da maiz, eta horien artean nabarmentzekoa da Arabako Esku Hartze Sozialeko Etika Batzordearen lantaldea. Lantalde horrekin lankidetzan aritzen da duela bi urtetik, erabakiak hartzeko prozesuetan dimentsio etikoarekin lotutako gaiei buruz.

Jardunaldia osatzeko, mahai inguru bat egingo da une garrantzitsuetan erabakiak hartu dituzten pertsonen testigantzekin (bi adineko egoitzan bizi dira, profesional bat eta senide zaintzaile bat). Ostegunean, hilak 9, izango da, 16:15etik aurrera, Vitoria-Gasteizko Ignacio Aldecoa Kultura Etxeko ekitaldi aretoan. Sarrera doan izango da, edukiera osatu arte.