Foru Aldundiak 60 urtetik gorako autonomoak TicketBAI nahitaez ezartzetik salbuetsiko ditu eta abenduaren 1era arte luzatuko du TicketBAI nahitaez ezarri beharra - prentsa

Gasteiz, 2022ko maiatzaren 27a.  Foru Aldundiak 60 urtetik gorako autonomoak salbuetsiko ditu TicketBAI ezartzetik, eta epea abenduaren 1era arte luzatuko die urrian lanean hasi behar zuten zergadunei.Ogasun,

Finantza eta Aurrekontuetako diputatu Itziar Gonzaloren arabera, “neurri hauek SEA, Gasteiz On eta Aenkomerrekin elkarlanean egiten ari garen entzute aktiboko prozesuaren emaitza dira. Erakunde hauek luzatu diguten solasaldiei esker, kalean bertan egindako lanean jasotako ekarpenak gauzatu ditugu”. Beraz, “jarduteko modu honi esker, eragindako kolektiboek adierazitako kezkei erantzuteko aukera luzatu digu”, azaldu du Gonzalok.

Foru diputatuak gogorarazi du “hau dela emaitza egokia lortzeko formula, bai erakundeentzat, bai herritarrentzat. Gure asmoa, hasiera-hasieratik, beti izan da hartu beharreko edozein neurrik babestuta egon behar zuela, eta aurkeztutako datuek hori bermatzen dute”.

Salbuespen horrek 3.000 zergadun ingururi eragingo die, eta, Itziar Gonzaloren iritziz, “erretiratzeko adinetik hurbil dauden eta, ondorioz, jardueraren amaieratik hurbil dauden pertsona fisikoei inbertitzeko ahalegina eskatzeak eragin du neurri hori. Hala ere, gure ustez, egon daitezke batzuk TicketBAIrekin bat egiten dutenak lehia desleiala saihesten laguntzeko eta, gainera, tokiko ehun ekonomikoaren parte direla erakusteko”.

Abenduaren 1era arteko luzapena Foru Ogasunaren borondatearen ondorio da, ahalik eta zergadun gehienek % 60ko kenkari zabaldua baliatu ahal izan dezaten.

 Bi iragarki hauek gaur goizean aurkeztu ditu foru diputatuak, zeinek SEA, Gasteiz On eta Aenkomerrekin batera egindako TicketBAI zabaltzeko planaren emaitza ere ezagutzera eman duen.

Zabalkunde plana

Zabalkunde planak, topaketa, jardunaldi eta hitzaldien bidez, proiektu honen irismenari buruzko ezagutza egokia eman du. Hurbileko laguntza formula bat da, non, Ogasun Saileko diputatuaren esanetan, “zuzeneko harremana ezartzeak erakunde horien bitartez, zeinekin informazio digitalizatuaren transmisio sistema berrira egokitzeko lanak egin behar baitituzte, segurtasuna eta konfiantza sortzen baitu”.

SEA enpresako zuzendariondoko Aitor Otaolak zehaztu duenez, “SEA Arabako Enpresak 1.000 enpresekin jarri da harremanetan azken asteetan; haietatik % 15 erabiltzen ari da jada modu eraginkorrean edo proba gisa, eta ehuneko hori % 25era igotzen da zerbitzuen sektorean; aldiz, enpresa guztien % 54 tresna hori aplikatzeko beharrezkoa den softwarea instalatzeko prozesuan dago”.

Otaolak TicketBAI zenbateraino ezagutzen den ere nabarmendu du; izan ere. “Arabako Lurralde Historikoan oso zabalduta dago, kontaktatutako enpresen % 96k baieztatzen duten bezala. Ehuneko horrek, proiektu hori ezagutzeaz gain, bide hori aktibatzea ahalbidetzen duen ziurtagiri elektronikoa ere badu” esan du.

Bestalde, Gasteiz On elkarteak gauzatutako ekintzei buruzko datuak aurkeztu ditu. “Gasteiz On elkarteak merkataritza, ostalaritza eta zerbitzuetako 800 establezimenduri emandako aholkularitza pertsonalizatuaren ondoren lortutako emaitzen laburpen labur batean, esan dezakegu % 100ek TicketBai ezagutzen zutela, % 86k prozesuan laguntzarik behar ez zutela eta % 70ek hura ezartzeko kudeaketak egiten hasiak zirela. Izan ere, nahitaezkoa izan aurretik, % 7k funtzionatzen dauka dagoeneko, eta % 11k instalatuta, hasteko zain. % 29k soilik ez du oraindik horren inguruko kudeaketarik egin”, azaldu du Diego Martínez de San Vicentek, Gasteiz On elkarteko lehendakariak.

Aenkomer elkarteko lehendakari Jon Aspuruk probintziako merkataritza eta zerbitzuetako 1.000 establezimendu baino gehiagori telefonoz egindako jarraipenaren emaitza azaldu du. “Kontaktatutako pertsonen % 96k ezagutzen du araudia, % 35 egokitu da jada, eta % 30 prozesuan dago” zehaztu du.  Eskualdeka, Aspuruk zehaztu duenez, “Gorbeialdean, negozioen % 32 egokitu dira Ticket Bai sistemara, eta negozioen % 25 prozesuan dago. Mendialdean, berriz, egokitzapena % 31koa da, eta % 27k baieztatu du bidean dagoela. Aiaraldean, egokitutako negozioen kopurua % 30ekoa da, eta % 33 prozesuan dago”.

 Itziar Gonzalo foru diputatuak balioetsi egin ditu entzute-prozesu honetan erdietsitako emaitzak; izan ere, prozesuan “ezagutza-maila oso handia dela egiaztatu delako, eta gainera izapidetzean aurrera egin da ere, beharretara ondoen egokitzen den sistema edukitze aldera”.

Gaur egun, Ogasunera bidalitako Ticket Bai fakturen guztizko zenbatekoa 186 milioi eurokoa da.