Mar Dabán Enplegu, Merkataritza, Turismo eta Foru Administrazioaren Saileko diputatu berria da - arabapress

Vitoria-Gasteiz, 2026ko urriaren 22a.- Mar Dabán Aguayok gaur hartu du Arabako Foru Aldundiko Enplegu, Merkataritza, Turismo eta Foru Administrazioaren Saileko foru diputatuaren kargua.   Dabánek, zeina baita Zuzenbideko lizentziaduna eta Enpresen Administrazioko lizentziaduna, prestakuntza juridiko eta ekonomiko sendoa du, eta esperientzia handia kudeaketa publikoan, Arabako Lan eta Gizarte Segurantzako ikuskatzaile eta Espainiako Gobernuak lurraldean duen ordezkariorde gisa. 

Dabánek kargua hitzeman du Foru Aldundiaren Jauregian egindako ekitaldi instituzional batean, Ramiro González diputatu nagusiaren lehendakaritzapean eta Foru Gobernuko gainerako diputatuen, Inma Basterra Arabako Batzar Nagusietako lehendakariaren eta batzarkide taldeetako bozeramaileen aurrean. Eta euskaraz eta gaztelaniaz egin du, formula tradizional honekin: "Hitzematen dut Arabako foru, usadio eta ohitura onak defendatuko ditudala, autogobernuaren eta askatasunaren erakusgarri, justizia areagotuz".

Ramiro Gonzalezek ekitaldia itxi du foru diputatu berriari ongietorria emanez, sinetsita bere lana "Arabarentzat positiboa izango dela eta gure lurraldeko erronkei arrakastaz aurre egiten lagunduko duela" . "Eta gaur -gaineratu du- demokraten erronka nagusietako bat da askatasun sistema babestea gizartearen beharrei erantzun ahal izateko zerbitzu publikoen eta ongizate-estatuaren defentsan oinarrituta".

Diputatu Nagusiak ziurtatu dio zeregin berri horretarako foru gobernu osoaren laguntza eta babesa izango duela , eta deia egin dio gainerako erakundeekin lankidetzan aritzeko, "elkarrekin indartsuagoak garelako eta erronka handiei lankidetzatik baino ezin zaielako heldu".
Dabánek kargua hartu du Enplegu, Merkataritza, Turismo eta Foru Administrazioaren Saileko foru diputatu gisa, Cristina Gonzálezen ordez. Cristina Gonzálezek kargua utzi du Eusko Jaurlaritzako Turismo, Merkataritza eta Kontsumoko sailburu izendatu ondoren. Aldaketa horren ondorioz, Jon Nogales Mugikortasun Jasangarriaren eta Bide Azpiegituren Saileko foru diputatuak bere gain hartu du orain arte Gonzálezek bete duen lehen diputatu nagusiordearen kargua ere. 

Mar Dabán Aguayo (Malaga, 1991) prestakuntza juridiko eta ekonomiko sendoa duen profesionala da, esperientzia handia du administrazio publikoan, eta asko ezagutzen du Arabako lan, enpresa eta gizarte errealitatea; izan ere, zerbitzu publikoaren hainbat eremutan egindako ibilbideari esker, zuzenean ezagutu ahal izan ditu Arabako ekonomia eta gizarte sarea, lurraldearen beharrak eta erakundeen funtzionamendua.

Zuzenbideko lizentziaduna eta Enpresen Administrazioko lizentziaduna denez, bere karrera profesionala lan munduari eta lan harremanei lotuta egon da 2019 eta 2024 artean, Arabako Lan eta Gizarte Segurantzako ikuskatzaile gisa. Hala, Dabánek urte hauetan harreman zuzena izan du Arabako enpresen errealitatearekin, lan baldintzekin eta enpleguaren kalitatearekin eta langileen eskubideen babesarekin lotutako erronkekin. 

Ondoren, 2024ko martxotik, Espainiako Gobernuak Araban duen Ordezkariordetzaren buru izan da, eta administrazio publikoen gaineko ezagutza eta Arabako sektore ekonomiko eta sozialekiko harremana indartu ditu. Urte hauetan, etengabeko elkarrizketa izan du erakundeekin, enpresekin, saltegiekin, elkarteekin eta gizarte eragileekin, haien proiektuak ezagutzeko, haien premiak entzuteko eta erakundeen arteko lankidetza errazteko.