Arabak bere turismo eskaintza aurkezten die Sevillako eta Malagako bidaia agentziei eta bidaia agentzia handizkariei - arabapress

Vitoria-Gasteiz, 2021eko maiatzaren 12.- Arabako Foru Aldundia lurraldeko turismo eskaintza aurkezten ari zaie aste honetan Sevillako eta Malagako bidaia agentziei, bidaia agentzia handizkariei eta prentsa espezializatuari, Arabak merkatu nazionalean dituen erakargarritasunak ezagutzera emateko eta urteko bigarren erdian lurraldera bisitariak erakartzeko kanpaina baten esparruan. Maiatzean eta ekainean Espainiako hiri garrantzitsuenak bisitatuko ditu 'Etorri bidaiatzera' kanpainak.

Cristina González bigarren diputatu nagusiorde eta Enplegu, Merkataritza eta Turismo Sustapenaren Saileko foru diputatuak atzo Sevillan egindako aurkezpen ekitaldian izan zen, sektoreko 25 bat profesionalen eta prentsa eta irratiko ordezkarien aurrean. Ekitaldia Malagan izango da berriro, arratsaldeko lehen orduan, eta agentzia, bidaia agentzia handizkari, kazetari eta blogari kopuru antzekoak parte hartuko du.

Sevilla eta Malaga, eta horien eragin eremuak, leku interesgarriak dira Arabako turismoarentzat, Gasteizekin lotura baitute airez.

"Araba gure naturari, ondareari eta enogastronomiari lotutako hamaika jarduera eta esperientziaren bidez bizi, sentitu eta dastatzen den destino seguru, jasangarri eta inklusibo gisa aurkezten dugu.  Turistarentzat baino, inguruaz eta kulturaz presarik gabe gozatzen dakien bidaiariarentzat pentsatutako destinoa da", azaldu du Gonzálezek.

Pablo de Oraá Gatz Harana Fundazioko zuzendaria eta Jon Lasa Santa Maria Katedrala Fundazioko zuzendaria ere ari dira parte hartzen turismoko profesionalekin egindako lan jardunaldi horietan, Arabako turismo eskaintzaren funtsezko bi baliabideren berezitasuna eta historia zabaltzeko helburuarekin: Añanako Gatz Harana eta Gasteizko Santa Maria Katedrala, eta bere bisita gidatuen programa saritua.

'Etorri bidaiatzera' kanpainak jarraipena izango du maiatzaren bigarren erdian eta ekainean Madrilen, Bartzelonan, Valentzian, Zaragozan, Bilbon, Valladoliden eta Logroñon, "Arabako eskaintza turistikoa hiri horietako agentziekin, bidaia agentzia handizkariekin eta komunikabideekin partekatzeko, haiek erakartzeko eta preskriptore pribilegiatu horien bidez publikoari oro har iristeko. Gure kultur eta kirol ekitaldi nagusiak ere ezagutaraziko ditugu".

Arabako gastronomia ere kanpainaren protagonista da, eta, horrela, osasun eta segurtasun protokolo guztiak betez, Arabako ardoak eta zero kilometroko produktuak eskaintzen dizkie turismo sektoreko profesionalei.

Arabako eskaintza turistikoaren aurkezpena in situ egingo da Espainiako bederatzi hiritan. Udazkenean, fam trip edo egun batzuetako bidaia bat antolatuko da bidaia agenteen, bidaia agentzia handizkarien eta kazetarien eta bidaia blogarien parte hartzearekin, "Preskriptore pribilegiatu horiek tinkotu, Araba lehen pertsonan bizitzeko, sentitzeko eta dastatzeko aukera emanez".

Cristina Gonzálezek uste duenez, txertaketaren aurrerapenak eta herritar gehienen jokabide arduratsuak "mugikortasuna pixkanaka berreskuratzeko aukera ematen omen du, eta, beraz, turismoa pixkanaka suspertzeko aukera urtearen bigarren zatian. Sektorearen susperraldia merkatu nazionalak eta hurbileko turismoak bultzatuko dute, eta Arabako eskaintza bertan egotea eta susperraldi horri etekina ateratzea nahi dugu".