Araban, hondakinen Europako astea amaitzeko, berrerabilitako objektuekin lorategi bertikal bat eraiki dute “Ikusten duzuna baino gehiago dago” kanpainan parte hartu duten ikasleek - arabapress

Gasteiz, 2022ko azaroaren 28a. Arabako Foru Aldundiak, Egibideren eta Har Eman elkartearen laguntzarekin, hiri hondakinen kudeaketari buruzko “Ikusten duzuna baino gehiago dago” sentsibilizazio kanpainaren bigarren edizioa antolatu du. Arabako 7 herritako (Amurrio, Araia, Uribarri Gaubea, Guardia, Legutio, Santikurutze Kanpezu eta Gasteiz) hainbat ikastetxetan barrena ibili ondoren, gaur amaitu da Gasteizen.

Gasteizko Santa Barbara plazan San Viator ikastetxeko Lehen Hezkuntzako 6. mailako ikasleek jarduera bat egin dute herritarrak hondakinen inguruan sentsibilizatzeko. Begiraleen laguntzarekin, eta beraiek ekarri dituzten objektu birziklatuetatik abiatuta, lorategi bertikal bat eraiki dute, kanpainan landutako kontzientziazio mezu nagusiak tartekatzen dituena.

Eraikuntza horren bidez, ikasleek hondakinen kudeaketaren arloan eskuratu dituzten ezagutzak partekatu nahi dituzte, hondakinak murrizteko, berrerabiltzeko eta behar bezala birziklatzeko motibatzera bideratuta, kanpainaren esloganean jasotzen den moduan: Zure hondakinen atzean ikusten duzuna baino gehiago dago.

Natividad López de Munain Ingurumen eta Hirigintza zuzendariak, gaur goizean jardueran parte hartu duenak, nabarmendu du garrantzitsua dela etxeetan hondakinak behar bezala bereiztea, beste produktu batzuetan eraldatzen laguntzeko, eta, ondorioz, kostu ekonomikoak eta ingurumen kostuak aurrezteko. Gainera, esan du bereziki garrantzitsua dela frakzio organikoa behar bezala bereiztea konpostajearen bidez eraldatzeko, lursail degradatuak hobetzeko beharrezkoa den ongarri organiko bihurtuta.

Bestalde, Xabier López Santiago Egibide ikastetxeko Berrikuntzaren eta Erakunde Harremanen zuzendariak azpimarratu duenez, "hiru erakundeen arteko lankidetzaren arrakasta da adimen aniztasuna duten pertsonak laneratzeko aukera ematen duen aliantza dela".

Alde horretatik, gaur Santa Barbara plazaraino hurbiltzen diren arabarrek egitura polit horretaz gozatu ahal izango dute. Egitura hori Probintziako plazara eramango dute, eta bertan beste astebetez egongo da, herritarrak sentsibilizatzeko.

5 begirale, 10 ikastetxe eta Arabako 7 herri

Hilabete eta erdi honetan zehar, begirale taldea, adimen aniztasuna duten 5 pertsonaz osatua, Arabako geografian zehar ibili da birziklatzeko hainbat saio eta tailer eginez Lehen Hezkuntzako 5. eta 6. mailako ikasleekin.

Ikastetxe bakoitzean bi saio eginez, 200 haur baino gehiago trebatu dituzte, beren ikastetxeetan hondakinen inguruko enbaxadore bihurtzeko.  

Gainera, ekimenak barnean hartzen zuen eskolan txoko berde bat eraikitzea, espazioak naturalizatzeko eta kanpainaren lekuko izateko.

“Esperientzia horren balantze oso positiboa egiten dugu, bai parte hartu duten desgaituentzat, bai gizarteratzeko eta laneratzeko dinamika partekatu duten zentro okupazionalentzat, bai enpatia handia erakutsi duten ikasleentzat. Emaitza ikusita, gizarte eragile eta erakunde gehiago animatzea gustatuko litzaiguke aniztasun funtzionala duten pertsonak gizarteratzearen aldeko ekimen aitzindariak abian jartzera” adierazi du Ana Belén Otero Miguélez Gizarte Zerbitzuek zuzendariak, gaur goizean taldearekin batera jarduera egiten egon dena.

Hori lortzeko, taldeak Egibideko hainbat heziketa ziklotako irakasleen eta ikasleen parte hartzea izan du, baita Har Eman elkartearen esperientzia ere. Lankidetza formula aitzindaria da, aurreko edizioan ere arrakasta izan zuena eta ekintzari hezkuntza eta sentsibilizazio arloko tresna desberdinak ematea ahalbidetzen duena.

Gazteenentzako ekintzak bultzatuta, Arabako Foru Aldundiak hezten jarraitzen du arabarrek hondakinak hobeto kudea ditzaten.