Foru Aldundiak harmailetako gorabeherak eta errespetu faltak desagerrarazteko estrategiarekin aurrera jarraitzen du - prentsa

Gasteiz, 2025eko martxoaren 6a.  Joan den urtarrilean, urtebete bete zen Arabako Foru Aldundiak “Irainik ez, kito” izeneko kanpaina aurkeztu zuenetik, harmailetako irain eta errespetu falten aurkako kanpaina, hain zuzen, eta lau hilabete hura garatzen duen Harmailetan errespetua sustatzeko protokoloa atera zuenetik. Ildo horretan, Kultura eta Kirol Sailak, horrelako gertakariak desagerrarazteko eta kirol eragile guztiak eskola kirolean beharrezkoa den "klik sozial" horretan inplikatzen jarraitzeko estrategiaren barruan, bi bideo eta ekintzen zerrenda bat egin ditu bost eremutarako, parte hartzaile guztiek jardun ahal izan dezaten.

Ana del Val Kultura eta Kirol Saileko diputatuak gogorarazi duenez, "eskola kirolean hitzezko indarkeria eta errespetu faltak desagerraraztea eskola kirolean parte hartzen duten eragile guztien lana da: erakundeak, federazioak eta kirol erakundeak (ikastetxeak, guraso elkarteak, etab.), zeinek harreman zuzena baitute lehiaketetan modu batean edo bestean parte hartzen duten pertsonekin (kirolariak, teknikariak, arbitroak eta familiak); funtsezko zeregina dute eta izaten jarraitzen dute lehiaketetan errespetuzko portaera hezitzailea izango dela ziurtatzeko eta, horrela, klik sozial hori lortzeko".

Hori dela eta, "Harmailetan errespetua sustatzeko protokoloak" ezartzen dituen nahitaezko ekintzetatik harago (arbitroen petoak, protokoloa parte hartzaile guztiei zabaltzeko betebeharra), bai eta Eskola Kirolaren Foru Aginduan zehapen ahalmenaren araudi espezifikoarekin lotuta aurreikusten diren etorkizuneko beste aldaketa batzuetatik harago ere, orain banatzen den dokumentu honek ekintza argi batzuk aurkezten ditu, guztion helburua lortzeko bidean aurrera egiteko abian jar daitezkeenak.

Ekintzak bost kolektibori zuzenduta daude: entrenatzaileak, familiak, arbitroak, familien ordezkaria eta koordinatzailea edo zuzendaria. Era berean, kolektibo bakoitzari bi ekintza posible proposatzen zaizkio, bi mailatakoak: bata oso erraza eta bestea konpromiso handixeagoa eskatzen duena (bereziki denborari dagokionez). Erantsita doaz. Bideoak familiei eta arbitroei zuzenduta daude, eta hemen deskarga daitezke.

Gogorarazi behar da kanpaina hori ez zela sortu partidak eteteko edo zigortzeko, nahiz eta hori jasota dagoen azken neurri gisa; "adingabeen ingurunean portaera negatiboak desnaturalizatzeko eta haien gaineko gizarte pedagogia egiteko sortu zen, gertatzen diren lekuetatik desagerrarazteko, eta lan horretan, guztiok gaude inplikatuta eta guztiok parte har dezakegu", esan du, amaitzeko.