Foru Aldundiak martxan ipini du "Neskatoa eta kirola" lineako programa - arabapress

Vitoria-Gasteiz, 2023ko urtarrilaren 13a. Arabako Foru Aldundiaren Kultura eta Kirol Sailak, Ana del Val foru diputatuaren gidaritzapean, eta Gesto Deportivo enpresarekin elkarlanean, lineako programa hau martxan ipintzeko asmoa du: Neskatoa eta kirola.

Horren helburua, Del Val-ek esan duenez, “genero berdintasunaren sustapena eta genero artesiaren prebentzioa da, kirola tresna moduan erabiliz”. Arabako ikastetxeentzat eta kirol klubentzat da proposamena.

Zehazki, genero berdintasuna sustatzeko, lineako plataforma baten bidezko jarduerak proposatzen dira. Jarduera horiek Lehen Hezkuntzako 4., 5. eta 6. mailetako, DBHko 1., 2., 3. eta 4. mailetako eta batxilergoko 1. mailako haurrei eta Arabako haur, kadete eta gazte mailetako kirol-klubetako kirolari gazteei zuzenduta daude. Jarduera horiek ikasturtearen amaierara arte egin ahal izango dira.

Lineako plataforman, genero berdintasuna sustatzeko jarduera praktiko eta interaktiboak proposatzen zaizkie irakasleei, koordinatzaileei eta entrenatzaileei, kirola tresna moduan erabiliz. Hortaz, baliabide ezin hobea da adingabekoen ardura dutenek beren ikasleekin eta kirolari gazteekin erabili ahal izan dezaten.

Oraingoz, Kirol Zerbitzuak jakinarazpen bat bidali du ikastetxeetara eta kirol klubetara, izena eman nahi duten gorputz-hezkuntzako irakasleek, tutoreek edo beste irakasle batzuek, lehenengoen kasuan, eta entrenatzaileek, koordinatzaileek edo beste batzuek, bigarrenean, urtarrilaren 20ra arte (ostirala) izena eman ahal izateko.

Martxoaren 30era arte, lau bilera presentzial egingo dira (hasierako bat, prestakuntzako bi eta programaren jarraipenerako bat), plataformaren funtzionamendua, jardueren kronologia eta planteatzen den edozein zalantza azaltzeko. “Une horretan, gainera, haien eraginaren eta funtzionamenduaren ebaluazioa eta azterketa egin ahal izango dira”, adierazi du.

Emakumeen kirola bultzatzea

Legegintzaldiaren hasieratik, Kultura eta Kirol Sailak emakumeen kirola eta berdintasunaren aldeko borroka eta kirolean genero ikuspegia txertatzea bultzatu ditu.

“Legegintzaldiaren hasieran, kirolean berdintasuna sustatzeko eta genero ikuspegia txertatzeko politikak sustatzeko eta babesteko konpromisoa hartu nuen. Lehenengo ekintza eskola-kirolean genero ikuspegia txertatzeko gida bat argitaratzea izan zen. Ondoren, "Alavesas de Oro" hileroko aldizkaria argitaratu da, Emakumezkoen Kirolaren Jaia programatu da, emakumezkoen txapelketa ugari babesten dira, eta, urtean, emakumeen kirolerako dirulaguntza baterako deialdia egin da, 30.000 eurotik 60.000 eurora. Hala ere, oraindik asko geratzen da egiteko. Horregatik, honelako ekimenak sustatzen jarraitzen dugu, benetako berdintasuna lortu arte”.

Prestakuntza hori kontuan hartuko da 2022-2023 kanpainako eskola-kirola garatzeko dirulaguntzen deialdian.