Apirilaren 7an hasiko da errenta kanpaina Araban, eta ekainaren 25ean amaituko da - prentsa
Apirilaren 7an hasiko da errenta kanpaina Araban, eta ekainaren 25ean amaituko da
Egun horretatik aurrera, zergadunek "Rentafácil" modalitatean bidalitako proposamena onetsi ahal izango dute
Gasteiz, 2025eko martxoaren 12a. Apirilaren 7an hasiko da 2024ko ekitaldiari dagokion errenta kanpaina, eta ekainaren 25ean amaituko da.
Apirilaren 3tik aurrera, zergadunak Egoitza Elektronikoaren bidez sartu ahal izango dira, BAK, BAKQ edo baliozkoa den beste edozein ziurtagiriren bidez identifikatuta, beren zerga datuak kontsultatzeko eta egiaztatzeko ea "Rentafácil" aitorpen proposamena egin zaien.
Apirilaren 7tik aurrera, proposamena onartu edo, hala badagokio, aldatu ahal izango dute, honako hauek erantsiz: alokatutako higiezinen errendimenduak, ohiko etxebizitza alokatzearen kenkariak, etxebizitzaren konturako ekarpena edo dohaintzak eta banku helbideratzearen kontua. Proposamen horien baieztapenak, Arabako Foru Aldundiaren egoitza elektronikotik kanpo, 2025eko apirilaren 10etik ekainaren 17ra egin ahalko dira.
Halaber, apirilaren 7tik aurrera, “rentared” modalitateko aitorpenak aurkeztu ahal izango dira; zergadunek Arabako Ogasunak egindako pertsona fisikoen errentaren gaineko zergaren laguntza programaren bidez egindako eta Arabako Foru Aldundiaren Egoitza Elektronikotik bidali beharreko proposamenak dira.
Aitorpenak bidaltzeko, baliozkoak izango dira IZENPEk emandako BAK eta BAKQ identifikazio eta sinadura elektronikorako baliabideak, bai eta egoitza elektroniko horretan baliozkoa den beste edozein ziurtagiri digital ere.
Era berean, apirilaren 7tik aurrera, aholkularitza edo kudeaketa bulegoek beren bezeroen errentaren eta ondarearen gaineko zergaren aitorpenak aurkeztu ahal izango dituzte “rent@raba” modalitatean.
Apirilaren 10ean, errentaren gaineko zergaren aitorpenak aurrez aurre egiten hasiko dira Arabako Foru Ogasunaren bulegoetan (Gasteiz, Laudio eta Guardia), "rent@raba" modalitatean.
Doako zerbitzu hori zergadun guztiek eskuratu ahal izango dute, salbu eta 2024an jarduera ekonomiko batean aritu direnek, beren ohiko etxebizitza saldu dutenek, higiezinak edo akzioak saltzeko hiru eragiketa baino gehiago egin dituztenek edo merkataritza sozietateetako kotizatu gabeko partaidetzak saldu dituztenek, alokairu turistikorako higiezinak izan dituztenek edo lekualdatutako pertsonen araubide bereziari heldu nahi diotenek.