Arabako Foru Aldundiak ekainetik ekingo die berriro desgaitasuna duten adingabe eta gazteentzako atseden eta aisialdi programei - arabapress
Arabako Foru Aldundiak ekainetik ekingo die berriro desgaitasuna duten adingabe eta gazteentzako atseden eta aisialdi programei
- Zaintzaileek atseden denbora bat hartzeko aukera ematen du.
- 7 eta 30 urte bitarteko ume eta gazteentzako 150 plaza eskainiko dira, eta egonaldiez gozatu ahal izango dute Barria eta Espejoko aterpetxeetan.
Vitoria-Gasteiz, 2021eko maiatzaren 3a. Arabako Foru Aldundiak laugarren urtez jarraian bultzatuko ditu desgaitasuna duten eta laguntza handia behar duten 7 eta 30 urte bitarteko pertsonentzako atseden eta aisialdi programak. Programak Barriako eta Espejoko foru aterpetxeetan egingo dira, eta, guztira, 150 plaza eskainiko ditu asteburuetan eta aste osoko egonaldietan.
Iaz, Covid-19aren pandemiak egonaldiak egokitzera behartu zuen, baina aurten, ahal den neurrian, berreskuratu egingo da koronabirusa agertu baino lehen zegoen dinamika. Jarduera guztiak Covid-19aren transmisioa saihesteko prebentzio protokolo eta neurriekin gauzatuko dira.
Gizarte Ongizaterako Foru Erakundeak egindako Atseden Programak 120 plaza eskainiko dizkie, ekainetik azarora bitartean, desgaitasuna duten haur eta gazteei bi aterpetxeetan asteburuetako egonaldiak egiteko. Normalean, haur eta gazte horiek familiaren laguntza sarean artatzen dituzte. Haren xedea da zaintzaileei aukera ematea atseden hartzeko, indarberritzeko edo beren garapen pertsonalerako, edo bestela ezinezko gertatuko litzaiekeen premia egoeraren bati aurre egiteko.
Nola atseden egonaldiak Zainduz Araba Programan sartuta dauden, familia giroan zaintzeko prestazio ekonomikoa (FGZPE) jasotzen dutenek egonaldira ezer ordaindu gabe joan daitezke, urtean 15 egun gehienez.
Bestalde, Aisialdi Programak 30 plaza ditu asteko egonaldietarako, abuztuaren lehenengo hamabostaldian, Barriako aterpetxean. Parte hartzen duten haurrek eta gazteek aisialdiko eta bizikidetzako egun batzuez gozatu ahal izango dituzte ingurune seguru batean, bai eta jarduera inklusiboez ere.
Bi programak egiten ari diren bitartean, umeek eta gazteek harreman pertsonal berriak edukitzeko, gaitasunak garatzeko eta autonomia eta autodeterminazioa handitzeko ekintzak egingo dituzte, pertsona bakoitzaren beharrizanak ardatz hartuta. Monitore espezializatuek osatuko dute arreta taldea, eta programako parte hartzaileei behar dutenean laguntzeko eginkizuna izango dute, albait gehien parte hartu dezaten.
Plazak esleitzeko lehentasuna izango dute mendekotasun gradurik handiena dutenek, eta mendekotasun gradu bakoitzean, desgaitasun ehunekorik handiena dutenek.
Informazioa eskuratzeko eskaera aurkezteko eta eskatutako dokumentazioa bidaltzeko epea maiatzaren 20an amaituko da Atseden Programaren kasuan, eta maiatzaren 31n Aisialdi Programaren kasuan. Informazioa IFBSprogramarespiro@araba.eus eta IFBSprogramaocio@araba.eus helbide elektronikoetara bidal daiteke, edo hitzordua eska daiteke 945 151116 telefonoan.