Foru Aldundiak sei Bonelli arrano txita sartu ditu Kantabria mendilerroan - arabapress
Foru Aldundiak sei Bonelli arrano txita sartu ditu Kantabria mendilerroan
2015az geroztik, Aldundiak Bonelli arranoaren 30 ale sartu ditu berriro Arabako geografian, hegazti harrapari hori berreskuratzeko AQUILA a-LIFE proiektu europarraren barruan, hegazti harrapari hori Europako mehatxatuenetako bat denez.
Vitoria-Gasteiz, 2021eko maiatzaren 19a. Arabako Foru Aldundiak sei Bonelli arrano txita sartu ditu, gaur goizean, Kantabria mendilerroan; lau, Frantzian itxian hazitakoak dira eta beste biak, habietatik erreskatatuak Andaluzian. Ekintza AQUILA a-LIFE proiektuaren parte da. Europar Batasunak finantzatzen du, espeziea berreskuratzeko, Babes Bereziko Araubidean dauden Basa Espezieen Zerrendan "kaltebera" gisa kalifikatuta baitago.
Nati López de Munain Ingurumen zuzendariak sei txita kaiola batean askatzen parte hartu du, abuztuan behin betiko aske uztea ahalbidetuko duen ikaskuntza prozesuari ekiteko. "Aske utzi aurretik GPS bilagailu bat jartzen zaie, nola mugitzen diren jakiteko, mehatxu nagusiak aztertzeko eta neurri zuzentzaileak ezartzeko", adierazi du Ingurumen zuzendariak.
Linea elektrikoak dira Bonelli arranoaren mehatxu nagusietako bat, baita beste hainbat harraparirenak ere, eta, horretarako, Ingurumen Sailak hainbat estrategia lantzen ditu hegaztiak elektrokuzio bidez hil ez daitezen. Aldundiko teknikariek linea simulatuak dituzte, hegaztiak pausatzen direnean deskarga txiki bat jasotzen dute, ikas dezaten egitura elektrikoak ez ukitzen.
Linea elektrikoen mehatxuaren aurrean, Nati López de Munainek azaldu duenez, "Ingurumen Saila enpresa elektrikoekin lanean ari da, hegaztien elektrokuzioa saihesteko euskarriak, transformadoreak eta bestelako instalazioak egokitzeko".
Bonelli arranoa lehentasunezko harrapakina da, eta penintsulako iparraldean % 75eko gainbehera du. Horregatik, Arabako Foru Aldundiak urteak daramatza espeziea berreskuratzeko lanean, AQUILA a-LIFE proiektu europarraren barruan. Proiektu hori Nafarroa, Madril, Mallorca, Frantzia eta Italiarekin partekatzen du.
2015az geroztik, Foru Aldundiak Bonelli arranoaren 30 ale birsartu ditu lurraldean, zehazki Gaubean, Kanpezun, Sobronen, Guardian eta Antoñanan. Bonelli arranoa lurraldeko harraparia da, eta ipintzen zaien GPS gailuari esker, haien mugimenduak eta kontserbaziorako mehatxu nagusiak ezagutu ditzakegu.
Bonelli arranoari buruzko sentsibilizazio ekintzen barruan, Ingurumen Sailak bideo bat prestatu du, esteka honetan deskarga daitekeena: https://labur.eus/gCcil.