Arabako Foru Aldundiak ALHAOn argitaratu du etxebizitza birgaitzeko laguntzen deialdia - prentsa

Vitoria-Gasteiz, 2025eko martxoaren 7a.  Arabako Foru Aldundiak Arabako Lurralde Historikoaren Aldizkari Ofizialean (ALHAO) argitaratu du gaur toki-erakundeetan etxebizitzak birgaitzeko dirulaguntzen deialdia. 2025etik 2026ra bitartean 500.000 euroko aurrekontua izanik, laguntza-programa honen helburua da 20.000 biztanletik beherako udalerrietan kokatutako etxebizitzen bizigarritasun- eta energia-eraginkortasuneko baldintzak hobetzea, landa-ingurunean biztanleria finkatzen laguntzeko.

Etxebizitzari buruzko informazio guztia eskuratu ahal izateko, Aldundiak etxebizitza.araba.eus webgunea jarri du abian, arlo horretan erabilgarri dauden laguntzak biltzen dituen gunea. Gaur egun, birgaitzeko dirulaguntzak eta etxebizitza erosteko abalak kontsulta daitezke, eta laster alokairurako abalak sartuko dira, arlo giltzarri horretako erakundeen laguntza handitzeko.

500.000 euroko inbertsioa etxebizitza birgaitzeko

Programa 100.000 euro gehiagoz handitu ahal izango da, kredituak horretarako aukera ematen badu, eta obren kostu osoaren % 25erainoko dirulaguntzak aurreikusten ditu, gehienez 20.000 euro etxebizitza bakoitzeko. Energia-eraginkortasunean hobekuntzak dituzten despopulazio-arriskua duten udalerrietan, laguntza 26.000 eurora irits daiteke.

Onuradunek birgaitu beharreko etxebizitzaren jabe, maizter edo gozamendunak izan behar dute, eta etxebizitza horretan erroldatuta egon behar dute eta bertan bizi. Diruz lagundu daitezkeen jardueren artean daude kontserbazio- eta bizigarritasun-obrak, energia-eraginkortasuneko hobekuntzak, irisgarritasuna eta barne-berrikuntzak.

Deialdi honi buruzko informazio guztia, bai eta eskaerak izapidetzeko sarbidea ere, duela gutxi argitaratutako webgunean dago eskuragarri: etxebizitza.araba.eus.