Foru Aldundiak industria-digitalizazioa bultzatu du Aiaran, "Aiaraldea Digitala" proiektuarekin - prentsa

Vitoria-Gasteiz, 2025eko martxoaren 5a.  Arabako Foru Aldundiak, GAIA ezagutza eta teknologia industrien klusterrarekin lankidetzan, aurrera egiten du Aiaraldeko industria-ehunaren eraldaketa digitalean, "Aiaraldea digitala" proiektuarekin. Programa honen bidez, eskualdeko ETEen lehiakortasuna hobetzeko teknologia disruptiboen erabilera sustatzen duten proiektu pilotu berritzaileak garatzen ari dira.

Aiaraldeko Berehalako Jarduera Planaren esparruan eta Aiara Industrial Lab-en bitartez, Aldundiak hainbat ekimen jarri ditu abian, prestakuntza, deskarbonizazioa, azpiegitura logistikoen hobekuntza eta berrikuntza barne. Estrategia horren barruan, "Aiaraldea Digitala" funtsezko zutabe gisa finkatu da: 25 enpresa baino gehiago bisitatu dira, 20 proiektu baino gehiago definitu dira edo definitzeko fasean daude, eta dagoeneko bost proiektu hasi dira.

Abian dauden proiektuen artean, hauek nabarmentzen dira:

• ENKARKI: Adimen artifizialean oinarritutako tresna bat inplementatzea bainu kimikoak mantentzeko, entregatzeko eta biltzeko ibilbideak optimizatzeko, kostuak murrizteko eta eraginkortasun logistikoa ingurumen-inpaktu txikiagoarekin hobetzeko.

• KIDER: Erreferentzien bilatzaile adimenduna garatzea 150.000 produktu baino gehiagorako sarbidea arintzeko, diseinuko, merkataritzako eta produkzioko departamentuei mesede eginez.

• BARAÑANO LIKOREAK: Marketin-prozesuen digitalizazioa eta automatizazioa belaunaldi berriko cloud computing eta CRM sistema baten bidez.

• AMETS: Adimen Artifizialean oinarritutako "Tailer digitaleko burua" sortzea, planoetako irudietatik abiatuta, produkzio-prozesuak optimizatzeko aurretiazko lanak identifikatzea errazten duena.

• ZORROZA KUDEAKETA: NFC teknologia duen plataforma bat ezartzea edukiontzietan, gorabeheren kudeaketa hobetzeko, datuak denbora errealean bilduz eta aztertuz.

Lankidetza publiko-pribatua eta hurrengo urratsak

Programa hori lankidetza publiko-pribatuko eskema baten arabera garatzen da, eta Arabako Foru Aldundiak, GAIAk eta enpresek elkarrekin hartzen dute beren gain proiektuen finantzaketa.

Datozen hilabeteetan, ekimen berriak aktibatuko dira biki digitaletan, sentsore aurreratuetan eta robotiketan. Foru Aldundiak Aiara Industrial Labera hurbiltzeko deia egin die berrikuntzak egin nahi dituzten Aiaraldeko enpresa txiki eta ertain guztiei, eraldaketa digitala bultzatzeko laguntza izan dezaten.

Ekimen honekin, Arabako Foru Aldundiak eskualdearen garapen industrialarekin duen konpromisoa berresten du, sektorearen hazkunderako eta lehiakortasunerako motor gisa berrikuntzaren aldeko apustua eginez.