Foru Aldundiak, Afarabarekin sinatutako hitzarmenean, estimulazio kognitiboko programa berri bat sartu du dementziak dituzten pertsonentzat - arabapress

Gasteiz, 2023ko maiatzaren 19a.Gizarte Ongizaterako Foru Erakundearen (GOFE) Administrazio Kontseiluak lankidetza hitzarmen berri bat onetsi du Afaraba - Alzheimerra eta antzeko beste dementzia batzuk dituzten pertsonen senideen eta lagunen Arabako Elkartearekin, kolektibo horri arreta emateko programak aktibatzeko. Hitzarmen berri honek, lehen aldiz, "Dale al on" programaren finantzaketa barne hartzen du. Programa horrek estimulazio kognitiboa eskaintzen die, talde txikietan, narriadura kognitiboa duten eta dementziaren hasierako faseetan edo fase moderatuetan dauden pertsonei, eta, era berean, laguntza psikologikoa ematen die senide zaintzaileei. 

GOFEk, Arabako Foru Aldundiko Gizarte Politiken Sailari atxikitako erakundeak, aurtengo hitzarmenaren finantzaketa indartu du, 306.000 euro bideratu baititu horretarako, aurreko ekitaldian baino % 8,9 gehiago.

Arabako Foru Aldundia eta Afaraba lankidetzan ari dira 1997az geroztik elkarteak alzheimerra eta antzeko beste dementzia batzuk dituzten pertsonei arreta emateko egiten dituen jardueretan. Hitzarmenak lau programa biltzen ditu: 

•    Familiekiko esku hartze sozialeko zerbitzua, diagnostikoari eta dauden baliabideei buruzko informazioa eta aholkularitza emateko, sentimendu eta emozio negatiboei eta zalantzei aurre egiten laguntzen baitute. 

•    Senitartekoentzako laguntza taldeak, prestakuntza eta laguntza psikologikoa eta emozionala eskaintzen dutenak, zaintzaren kalitatea eta, batez ere, beren osasunaren kalitatea sustatu ahal izateko.

•    Haize Berri psikoestimulazio zentroaren kudeaketa eta funtzionamendua. Fase goiztiarretan narriadura kognitiboa edo dementzia duten eta jada errutina aktiborik ez duten pertsonak artatzen ditu, pertsona horien eta haien senideen bizi kalitatea hobetzeko. 

•    Hitzarmenean sartutako programa berria, 'Dale al on', Haize Berrin egindako jarduera ez bezala, dementzia diagnostikoa duten edo narriadura kognitiboaren zantzuak dituzten pertsonei zuzenduta dago, errutina aktiboa badute eta estimulazio kognitiboaz balia badaitezke.

Foru erakundearen zuzeneko eskumeneko zerbitzu prestazioak ez diren arren, GOFEk bere helburuen artean mendetasuna, desgaitasuna, hainbat gaixotasun edo gizarte bazterketako arriskuan dauden pertsonei arreta ematea duten lurraldeko hainbat elkarterekin mantentzen duen hitzarmenetako bat da.