Foru Aldundiak 300.000 euroko gehikuntza egin du abeltzaintza sektorearentzako kalte-ordainetan, gaixotasun hemorragiko epizootikoak Arabako ustiategietan duen eragina arintzeko - arabapress

Gasteiz, 2023ko azaroaren 9a. Foru Aldundiak aparteko laguntza lerro bat gaitu du abeltzaintza sektorerako, lurraldeko ustiategietan GHE gaixotasun hemorragiko epizootikoaren inpaktuari aurre egiteko. Foru erakundeak 300.000 euro esleituko ditu abeltzainei laguntzeko, gaixotasun horrek egun eta etorkizunean izan ditzakeen eraginak arintzeko.

Gaur goizean, Amaia Barredo Jasangarritasun, Nekazaritza eta Natura Ingurunearen Saileko diputatua eta David Fernández Nekazaritzako zuzendaria sektoreko erakundeekin bildu dira neurri horiek aurkezteko. Gaur egun, gainera, indarrean daude sektorea onuradun den beste laguntza batzuk, hala nola gorpuak kentzeari eta gorpuak suntsitzeari buruzkoak.

Laguntza berri horiek eragindako animalien heriotza eta albaitaritza eta tratamendu gastuak estaliko dituzte, 35 € arte animalia gaixo bakoitzeko. Laguntza horiek eskuratzeko jarraitu beharreko prozedurari dagokionez, ezinbesteko baldintzak izango dira animaliak albaitariaren gainbegirapean eta kontrolpean egon izana eta foru erakundeari gaixotasun hori izan zutela jakinarazi izana.

Gaixotasunak etorkizunean produktibitatean izan ditzakeen ondorioak ezagutu ondoren, Foru Aldundiak laguntza berriak sartzeko aukera aztertuko du.

Amaia Barredo diputatuarentzat "neurri honek babesa ematen dio gure sektoreari, bere egoera ekonomikoa zailtzen ari diren hainbat gertakari gertatzen ari diren urte honetan. Laguntza horrek heriotzengatiko kalte-ordainak emango ditu, eta albaitaritza laguntzak eta portaera aurreikusiezina duen eta oraindik epe ertainera zer bilakaera izango duen ez dakigun gaixotasun baten aurkako tratamenduek eragindako gastuak murrizten lagunduko du. Dena den, espero dugu tenperaturak jaisteak eta euri gehiago egiteak birusa geldiarazten laguntzea; hala ere, prebentzio neurriak aplikatzen jarraitu behar dugu".

Irailaren 6an lehenengo kasu susmagarria detektatu zenetik, Gaixotasun Epizootiko Hemorragikoa pixkanaka hedatuz doa Arabako ustiategien artean, eta lurralde osoan dago jada. Une honetan,  Aramaio, Aiara, Gaubea, Zuia eta Urkabustaiz dira udalerri kaltetuenak.

Ustiategi berrietan detekzio kasuak beherantz egiten hasi dira; izan ere, tenperatura jaitsierak eragin du eltxo bektorearen ondorioz gaixotasuna transmititzeko baldintza klimatikoak gero eta okerragoak izaten hastea. Orain arte, eragindako 185 ustiategitan (Araban daudenen % 28) 477 animalia baino gehiago diagnostikatu dira (gure lurraldean erregistratutakoen % 1,19), eta hildako 20 animalia baino gehiago erregistratu dira.

Foru erakundeak Araban GHE kasuak gertatzen ari zirela jakin zuenetik, sektorea jakinaren gainean eduki du haren irismenari eta hartu beharreko prebentzio neurriei buruz.

Gaixotasunari buruzko informazioa.

Pertsonei eragiten ez dien animalia gaixotasun bat da, nahitaez adierazi beharrekoa.

Behi aziendaren koadro klinikoan honako hauek agertzen dira: sukarra, anorexia, aurpegiko edema (batez ere konjuntibakoa), begietako eta/edo sudurreko jarioa, listu jarioa, disnea, muturraren eritema edo ezkatatzea, herrentasuna (errodetearen hantura), errapearen eritema, mihiaren eta konjuntiben hantura eta irensteko zailtasuna. Horren ondorioz, animalia hil daiteke.

Eme ernaldunen kasuan, abortua ezin da baztertu. Esnea ematen duten emeetan esne ekoizpena gutxitu egin daiteke.

Behien kasuan, susperraldia azkarra eta gogobetegarria da gaixotasuna berehala tratatzen bada. Neurriak berandu hartzen badira, ondorio larriak izan ditzake, baita animaliaren heriotza eragin ere. Bereziki garrantzitsua da hidratazio egokia bermatzea. Animaliek edateari uzten badiote, deshidratazio arrisku larria dago. Horregatik, berebiziko garrantzia du behi aziendak behar bezala ikuskatzeak, gaixotasunaren edozein arrasto berehala detektatzeko eta albaitariari jakinarazteko.

Gaur egun, EBn ez dago gaixotasun horren aurkako txerto baimendurik.Haragitarako behien (behi ume-hazleen) eta esnetarako behien maneiu eta ekoizpen mota guztietan diagnostikatu da. Oraingoz ez da diagnostikatu gizendegietan.

Animalia gaixoen transmisioaren bilakaera

Udalerri kaltetuenak: Aramaio (77), Aiara (53), Gaubea (41), Zuia (39) eta Urkabustaiz (30).