Foru Aldundiak "Araba bizikletaz" atera du txirrindularitza zaleak diren bidaiariak erakartzeko - prentsa
Foru Aldundiak "Araba bizikletaz" atera du txirrindularitza zaleak diren bidaiariak erakartzeko
Kirol honetaz familian, errepideko bizikletan, gravel-en, BTTn eta bikepacking-en gozatzeko ibilbideak biltzen dituen gida bat du, bai eta ikus-entzunezko bat ere
Ibilbide bakoitzak mapa eta QR-a ditu, track-erako eta profilerako sarbidearekin
Gasteiz, 2025eko martxoaren 31.- Arabako Foru Aldundiak turismo proposamen berri bat egin du gaur, "Araba bizikletaz" izenekoa, txirrindularitza modalitate guztietan zaleak diren bidaiariak erakartzeko eta probintzia kirol helmuga eta aire zabaleko jarduera gisa finkatzeko. "Araba bizikletaz" proposamenak hamabost bat ibilbide eta plan eskaintzen ditu kirol honetaz gozatzeko familian, errepideko bizikletan, gravel-en, BTTn eta bikepacking-en.
Enplegu, Merkataritza eta Turismo Saileko foru diputatu Cristina Gonzálezek eta arloko zuzendari Felipe Garcíak aurkeztu dute gaur proiektu hori, eta lehentasunen arabera segmentatutako eskaintza bidaiarien eskura jartzeko estrategia baten barruan kokatu dute. Gonzálezek ziurtatu duenez, bizikleta "Arabaz gozatzeko eta haren izaera, ondarea eta gastronomia ezagutzeko bitarteko ezin hobea da. Eta, gainera, modu jasangarrian".
"Araba paradisu bat da bizikleta zaleentzat. Hona hemen horren arrazoietako batzuk: paisaia ikusgarriak, zeinak lotuak baitaude mila kilometro baino gehiagoko ibilbide berdeen, bidezidor eta bide ia amaigabeen, BTT zentroen eta trafiko gutxiko bigarren mailako errepide sare baten bidez. Paradisu irisgarri bat da guztiontzat: familiak; banakako eta taldeko txirrindulariak; seniorrak; errepideko, mendiko edo gravel-eko bizikletaren zaleak; profesionalak; amateurrak... ", gaineratu du.
"Araba bizikletaz" proiektuak 44 orrialdeko gida bat du, gaztelaniaz, euskaraz, ingelesez eta frantsesez editatua; sustapeneko ikus-entzunezko bat da, hainbat formatutan egina, aurkezpenetan, sare sozialetan eta abarretan zabaltzeko, bai eta txirrindulariek erabiltzen dituzten lineako plataformetako kanal ofizialetan ere, ibilbideen track, deskribapen eta argazkiekin (Wikiloc, Bikemap, Naviki, Ridewithpgs, Alltrails...).
Gida bost ataletan egituratuta dago, txirrindulari motaren arabera: Familia turismoa, gravel-a, mendiko bizikleta, errepidea eta Araban barrena bidaiatzea.
Lehenengo kapituluak lau ibilbide proposatzen ditu turismo mota horretaz familian gozatzeko, zeinaren xede baita natura bete-betean dauden agertokiak partekatzea: Gasteizko eraztun berdearen ibilbide zirkularra, zeinak zeharkatzen baititu Salburuko hezeguneak, Armentiako basoa eta beste naturagune batzuk (33 km); Vasco-Navarroren Bide Berdea, Estibalizko santutegiraino (27 km); Vasco-Navarroren Bide Berdea, Landako hondartzaraino (29 km), eta Nerbioiko Parke Lineala, Aiaraldean, izen bereko ibaiaren inguruan (20 km).
Hurrengo atala gravel modalitatean aritzen direnei zuzenduta dago. Errepidean eta mendian ibiltzeko bizikleta mistoa da, eta asfaltoa, pista eta bidezidorrak aldi berean egiteko aukera ematen du, bi ibilbiderekin: Vasco Navarro Gasteiz/Acedo (106 km), askotariko paisaiekin, hala nola Gereñuko portuko arrapala gogorrak, eta urtegiaren perimetroa, Uribarri Ganboako urtegirako ibilbide zirkularra paisaia ikusgarrien artean (44 km)
Pagadi eta gailur artean
Pagadien arteko bidezidorrak, kasik igo ezin diren arrapalak eta gailurrak dira mendiko bizikletari eskainitako hirugarren kapituluaren protagonistak. Proposamenek, kasu honetan, naturagune pribilegiatuetan dauden Arabako bi BTT zentroetara garamatzate: Izki BTT eta Valderejo BTT, maila guztietarako markatutako 22 ibilbiderekin (600 kilometro baino gehiago), eta Arrato-Badaia mendilerroan eta Gasteizko mendietan barrena doazen bi ibilbiderekin (Ganalton eta Pagoganen egiten dute gailurra, hurrenez hurren).
Asfaltoko txirrindulariei eskainitako atalak bi proposamen desberdin eta osagarri ditu: Herrerako itzulia, zeinak aukera ematen baitu arrapala gogorrez mila metrotik gorako altueran gozatzeko, bai eta pagadi eta mahastien arteko ingurune apartaz gozatzeko aukera ere (112 km); Uribarri Ganboako urtegiaren itzulia, zeina ibilbide klasikoa baita, presarik gabe ibiltzeko eta herri txikiak eta paisaia ikusgarria (47 km) ezaugarri dituen ibilbide horretaz gozatzeko.
Azken kapitulua bizikleta erabiltzen duten pertsonei zuzenduta dago; hain zuzen ere, alforjak edo bikepacking-a garraiobide eta mugitzeko eta lurraldea ezagutzeko tresna gisa erabiltzen dutenei, eta Araba sentitu eta bizitzeko bi plan eskaintzen ditu, bai eta bertako herriak eta jendea modu desberdinean ezagutzeko ere: Arabako Lautadako ibilbide zikloturista handia, bi edo hiru egunetan egin daitekeena, gravel bizikletaz, hibridoz edo mendi bizikletaz (118 km); eta Arabako Itzulia, errepidez (319 km).
Azken bidaiari ibilbide hori Araban zehar ibiltzeko pentsatuta dago, inguruneaz eta ekojolas espazioez gozatuz, eta, jakina, pedalei eragiteko ametsetako agertokietan: mendi portuak ikuspegi ikusgarriekin, Erdi Aroko hiribilduak, mahasti amaigabeak, ibaiek zeharkatzen dituzten haranak, barnealdeko hondartzak, naturaguneak..
Gidako ibilbide bakoitzak honako hauek ditu: deskribapen labur bat eta argazki argigarriak, ibilbidea jasotzen duen mapa bat, distantzia eta desnibela dituen fitxa bat, eta QR bat, ibilbidearen track-erako sarbidea ematen duena GPS gailuetan eta telefono mugikorretan deskargatzeko, bai eta informazio praktikoa ere (distantzia, desnibela, zailtasun teknikoa, gehieneko altitudea, ibilbidearen iraupena eta natura eta ondare erakargarritasun nagusien adibideak ematen dituzten irudiak).
"Araba bizikletaz" argitalpena dagoeneko eskuragarri dago formatu digitalean alavaturismo.eus web atariko "deskargak" gunean, eta paper formatuan ere eskuragarri egongo da datozen asteetan Arabako udal eta eskualde turismoko bulegoetan. Euskaraz eta gaztelaniaz ez ezik, frantsesez eta ingelesez ere egongo da, atzerritik gero eta gehiago datoz