Foru Aldundiak lehentasuna eman dio Lezako bidegurutzearen segurtasuna hobetzeari - prentsa

Gasteiz, 2025eko apirilaren 2a.- Arabako Foru Aldundiak lehentasuna emango dio 2025ean Lezako bidegurutzearen eta inguruan kokatuta dauden Alavabuseko geralekuen bide segurtasuna hobetzeari. Horretarako, bidegurutze horretako argiztapena indartuko da, eta Samaniego eta Leza arteko A-124 errepidea egokitzeko proiektua idazteko lizitazioa egingo da.

Jon Nogales Mugikortasun Jasangarriaren eta Bide Azpiegituren Saileko foru diputatuak Arabako Batzar Nagusien osoko bilkuran iragarri ditu gaur bi erabaki horiek, eta azpimarratu du bat egiten dutela "azken ekitaldietan gure bide sarearen puntu horretan segurtasun handiagoa eskaintzeko ezarritako neurri sorta batekin".

"Hainbat neurri dira, hala nola radar bat instalatzea ibilgailuen igarotze abiadura murrizteko, seinaleak indartzea igarotze abiadura 80 km/h-ra mugatzeko eta aurreratzeak debekatzeko, eta lur erauzketak egitea ikuspena hobetzeko. Gainera, eta oinezkoak egon daitezkeela ohartarazteko, argi seinaleak jarriko ditugu", zehaztu du.

Nogalesek ziurtatu du A-124, A-2124 eta A-3212 errepideek, Lezako ospitaleko sarbideek eta osasun zentro horretara garraio publikoz joaten diren arabarrek erabiltzen dituzten Alavabuseko geltokiek bat egiten duten bidegurutze "konplexu" baten segurtasuna hobetzeko lanean jarraituko dutela.

Hala, eta lehenengo neurri gisa, iragarri duenez, "aurten hobetu egingo dugu bidegurutzearen eta autobus geltokien inguruko argiztapena; izan ere, argiztapen egokia funtsezkoa da bidegurutzearen beraren eta bi markesinen ingurunearen ikuspena indartzeko, eta, horrekin batera, bide segurtasuna, gaueko ordutegian".

Egungo argiztapen sistema markesinetan kokatutako bi farola dira, eta datorren udazkenean gauzatuko den hobekuntza proiektuan zazpi LED luminaria berri instalatuko dira galtzadaren bi ertzetan, eta markesinetan bertan barne argiztapena jarriko da. 40.000 euroko inbertsioa dago aurreikusita.

Foru diputatuak azaldu duenez, bidegurutze horren eta Lezako ospitaleko sarbideen behin betiko konponbidea "A-124 errepidea Samaniego eta Leza artean egokitzeko eta hobetzeko proiektua gauzatzen denean iritsiko da, Arabako Errepideen Plan Integralak aurreikusten duen bezala. Proiektu horrek osasun zentroarentzat guztiz seguruak diren oinezkoentzako geralekuak eta ibilbideak hartuko ditu barne".

Proiektu integrala

Nogalesek jakinarazi du Mugikortasun Jasangarriaren eta Bide Azpiegituren Saileko talde teknikoa, une honetan, baldintza agiriak amaitzen ari dela datozen hilabeteetan, aurten bertan, proiektu honen idazketa lizitatzeko. "Proiektua aurten eta 2026an idazteko helburuarekin lan egiten dugu, obrak lehenbailehen lizitatzeko moduan egon daitezen, aurrekonturik izanez gero".

Mugikortasun Jasangarriaren eta Bide Azpiegituren Saileko foru diputatuak Batzar Nagusien osoko bilkuran aurreratu du aurten Errepideen Foru Sarea egokitzeko eta hobetzeko beste sei proiektu, Eltziego eta Guardia arteko bizikleta bide berri baten proiektua eta Baranbioko zeharbideari buruzko azterlan bat idazteko kontratazioa egingo dela. Hau da 2025ean idatziko diren proiektuen zerrenda:

• A-132 eta N-104 errepideak lotzeko errepide berriaren proiektua.

• Villafranca eta Egileta artean A-132 errepidea hobetzeko proiektua.

• Laserna eta Oion artean A-3226 errepidea hobetzeko proiektua.

• Kexaako sarbidean A-3626 errepidea hobetzeko proiektua.

• Artziniegako zeharbidea egokitzeko eta urbanizatzeko proiektua.

• Iekorako zeharbidea egokitzeko eta urbanizatzeko proiektua.

• Eltziego-Guardia bizikleta bidearen proiektua.

• Baranbioko zeharbidea hobetzeko azterlana eta beste aukerarekin alderatzea.

Nogalesek azpimarratu du, gainera, uda honetan amaituko direla Tejerako mendatea eta Gesaltza Añanako saihesbidea hobetzeko proiektua idazteko lanak.