Arabako Ogasunak 95,2 milioi euro erregularizatu ditu zerga iruzurrari aurre egiteko borrokan - prentsa

Gasteiz, 2025eko apirilaren 2a Foru Ogasunak 95,2 milioi euro berreskuratu ditu 2024an, zerga iruzurrari aurre egiteko borrokan. Itziar Gonzalo Ogasun, Finantza eta Aurrekontu Saileko foru diputatuak gaur goizean kontroleko osoko bilkuran azaldu duenez, "zenbateko hori zergak kudeatzeko eta ikuskatzeko batera egindako ahaleginari esker lortu da".

Ildo horretan, foru arduradunak azpimarratu duenez, «iruzur fiskala prebenitzea eta hari aurre egitea Arabako Ogasunaren lehentasunezko helburuetako bat da, pertsona guztiek beren gaitasun ekonomikoaren arabera gastu publikoei aurre egiten laguntzen dutela bermatzeko». Itziar Gonzalok emaitzen zifra orokorrak zehaztu ditu bere agerraldian. Hala, zergen kudeaketari dagokionez, 18 milioi euro berreskuratu dira 2024an, eta 2023ko ekitaldian, berriz, 20,8 mililoi. Ildo horretatik, PFEZari dagozkion 5,8 milioi euroak nabarmendu behar dira, hau da, aurreko urtean baino 0,6 milioi gutxiago.

BEZari dagokionez, 5,1 milioi berreskuratu dira «zenbateko horrek 2023aren aurreko urteetako joerari jarraitzen dio. Urte horretan, espediente pare batek zerga hori dela-eta azaleratutako zenbatekoa apartekoa izatea eragin zuten», zehaztu du Gonzálezek.

Ikuskaritza zerbitzuak egindako jarduketen emaitzen arabera, 77,2 milioi berreskuratu dira, hau da, iaz baino %1 gehiago.  Zergaka, PFEZen % 71 gehiago bildu da aurreko ekitaldian baino, «5,5 milioi euroko aurkikuntza egon baita». BEZaren eta sozietateen kontzeptuetan 11,8 milioi eta 11,1 milioi detektatu dira, hurrenez hurren.

Iruzurraren aurkako planak zergadunen zerga egoera erregularizatzeko eta zerga zorrak kobratzeko neurriak jasotzen ditu. Helburu horiek lortzeko, planak hiru lan eremu jasotzen ditu. Alde batetik, informazioa lortzeko jarduketak, “aitortutako datuen kontraesanak detektatu ahal izateko eta zorra kobratzeko aukera hobetu ahal izateko, besteak beste”. 

Bestetik, iruzurra egitea eragozten saiatzen diren prebentzio ekintzak daude. Horien artean, Ogasuneko diputatuak honako hauek aipatu du: «arrisku fiskaleko egoeran egon daitezkeen zergadunak aldez aurretik identifikatuta izateko jarduketak, zerga jardunbide egokiak sustatzeko ekintzak eta zerga balio zibikoetan kontzientziatzeko eta hezteko ekintzak».

Badaude, era berean, erregularizatzea eta kobratzea helburu duten esku hartzeak, non zerga egoera egiaztatzen eta ikertzen baita kudeaketa eta ikuskapen organoek garatutako prozeduren bidez.

Ekitaldi honetarako, Iruzurraren aurka Borrokatzeko Planak hainbat ekintza ezartzen ditu informazioa lortzeari dagokionez, besteak beste, informazioa trukatzeko nazioarteko akordioak ustiatzea, nazioarteko fiskalitatearen arloan jarduten duten zergapekoak aztertzea edo ekonomia digital berriaren esparruan informazioa lortzea.

Kriptotxanponei dagokienez, zergadunek informazio aitorpen berriak behar bezala aurkeztu dituztela egiaztatzeko jarduketak proposatzen dira.

Prebentzioari dagokionez, dokumentuan garapen teknologikoak aplikatzea planteatzen da, iruzurra egin aurretik prebenitzeko, hala nola ticketBAI edo ikastetxeetan zerga hezkuntzako proiektua finkatzea, besteak beste.

Azkenik, 2025eko erregularizazio eta kobrantza jarduketei dagokienez, enpresa taldeen eta talde fiskalen kontrola aurreikusten da sozietateen gaineko zergan, bai eta aitorpenetan, justifikatu gabeko ondare irabazietan eta eragiketa lotuetako transferentzien prezioen kontrolean inkoherentziak dituzten zergadunen kontrola ere.