LAIA Emakumeen Jabekuntzarako eta Berdintasunerako Arabako Sareak ikasturte berriaren programazioa aurkeztu du - arabapress
LAIA Emakumeen Jabekuntzarako eta Berdintasunerako Arabako Sareak ikasturte berriaren programazioa aurkeztu du
Eskualdeko topaketak nabarmentzen dira, kuadrilletako erreferentziazko espazio gisa, non gai espezifikoak sakonki lantzen baitira
Iaz, LAIAk 419 jarduera egin zituen, eta 11.766 pertsona bertaratu ziren; haietatik % 75 emakumeak izan ziren
Gasteiz, 2022ko irailaren 12a. LAIA Emakumeen Jabekuntzarako eta Berdintasunerako Arabako Sareak 2022-2023 ikasturte berriari ekin dio, jarduerak lurralde osoan programatuz. Berdintasunaren eta Giza Eskubideen zuzendari Ainhoa Campok LAIAren asmo handiko programazioa aurkeztu du gaur goizean, zeina daukan izaera integratzaileagatik nabarmentzen baita. Foru zuzendariaren ustez, nabarmentzekoa da “haren ibilbideko sei urteetan proiektu integratzaile eta parte hartzaile gisa” finkatu dela, eta bertan aktiboki parte hartzen dutela “udalek, toki erakundeek, emakumeen elkarteek, mugimendu feministek, GGKEek eta hainbat eremutako beste erakunde batzuek”.
Eskaintzen den programazio luzetik, eskualdeko topaketak nabarmentzen dira, kuadrilletako erreferentziazko espazio gisa. Haietan gai espezifikoak sakonki lantzen dira. Aiaraldean, esaterako, zainketen gaia ikuspegi feministatik jorratuko da, eta hainbat udalerrik gauzatutako jardunbide egokiak aurkeztuko dira.
Epe luzeagorako jabekuntza kolektiboa bilatzen duten "prozesu espazioak" deiturikoak dira jarduera garrantzitsuenetatik beste batzuk. Esate baterako, Añanan, FEMprende programa dago, zeina baita indarkeriaren biktima diren emakumeei eta indarkeria matxistatik bizirik atera direnei laguntzeko Aguraingo udalerriko programa, bai eta Zurrumurruen aurkako ekimena, ikuspegi feminista oinarri, eta "Zahartze ona izan" programa ere, besteak beste.
Era berean, ikastaro honek gazteak inplikatzen dituzten espazioak izango ditu, hala nola Iruña Okako Udalaren sexualitateari buruzko SexOka aholkularitza zerbitzu berria, nerabeentzako ziberindarkeriari buruzko lantegi bat Gorbeialdean, edo mutiletan edo nesketan osasuntsu egiten landuko duen “Rollo onean konektatu zaitez” lantegia Mendialdean.
Gainera, hitzaldiak izango dira lurraldeko hainbat herritan, hala nola Isabel Mellének Mendialdean eskainiko duena, zeinak hitz egingo baitu emakumeek arte erromanikoan utzitako aztarnei buruz; bai eta lantegiak ere, hala nola Trebiñuko maskulinitateena, datozen hilabeteetan biltzen jarraituko den gizon talde bati eustea lortu duena.
Horiek horrela, Trebiñuk I. Berdintasun Plana (2022-2025) onetsi du aurten. Plan horrek gizarte bidezkoago, berdinzaleago eta indarkeriarik gabeago baterantz lan egiteko ibilbide orria ezartzen du.
Iaz, LAIAk 419 jarduera egin zituen, eta 11.766 pertsona bertaratu ziren; haietatik % 75 emakumeak izan ziren. 2020. urtearekin alderatuta, % 42ko hazkundea izan da bertaratzeari dagokionez, eta % 31koa jarduerei dagokienez. Haietan, feminismoak, genero identitateak, ekonomia feminista, jabekuntza soziopolitikoa eta trebetasun sozialak edo kulturartekotasuna bezalako gaiak jorratu ziren. Askotariko formatuak erabiliz, publiko desberdinengana iritsi nahi zen.
Laia Laudio sortu da
Laudiok jabekuntzarako udal eskola berri bat izango du laster, eta haren jarduerak LAIAren barruan kokatuko dira. “Kontua da emakumeen parte hartze publikoan sakontzen eta areagotzen jarraitzea, gizartea eraldatzeko eragile aktibo diren aldetik, eta, horretarako, badute espazio propio bat, Lezeaga Aretoa”, azaldu du Ainhoa Campok.