Vitoria-Gasteiz Araba Film Commission sortu dute - prentsa

Gasteiz, 2025eko otsailaren 17a. Vitoria-Gasteizko Udalak eta Arabako Foru Aldundiak lankidetza-hitzarmena sinatu dute ‘Vitoria-Gasteiz Araba Film Comission’ martxan jartzeko. Zerbitzu horrek tokiko, Estatuko eta nazioarteko ikus-entzunezko ekoizpen-etxeen kudeaketak erraztuko ditu, eta hiriburuan eta lurralde osoan kokapenik onenak aurkitzen lagunduko die.
Santa Maria Katedralean egin dute hitzarmena sinatzeko ekitaldia. Ondare-balio handiko eraikina da, eta hainbat ekoizpen-etxeren interesa piztu du bertan beren film luze batzuetarako eszenak filmatzeko. Ekitaldian, Maider Etxebarria Gasteizko alkateak eta Ramiro Gonzalez Arabako ahaldun nagusiak akordio horren arrazoien berri eman dute.

Ikus-entzunezkoen sektoreak Araban eta Gasteizen izandako gorakadak eta sendotzeak eragin du hitzarmena, bai eta lurraldean bideratutako ikus-entzunezko ekoizpenen kopuruaren hazkunde nabarmenak ere. Hori dela eta, beharrezkoa da lankidetza-mekanismoak abian jartzea, bi erakundeek abian jarritako helburuei erantzun eraginkorragoa eman ahal izateko.
Lehentasunezko helburuak ikus-entzunezko proiektuak filmatzeko eta horien garapena errazteko gune gisa Gasteiz eta Araba sustatzea eta bultzatzea dira, bai eta tokiko zinematografiako sektorea eta ikus-entzunezkoen sektore osoa (eta haren lehiakortasuna eta kalitatea) indartzea ere.

Gasteizko alkateak, bere aldetik, bere taldeak ildo horretan egindako lana nabarmendu nahi izan du. “Udalak 14 urte baino gehiago daramatza ikus-entzunezkoen sektorearekin batera lanean, Vitoria-Gasteiz Film Office erakundearen bidez. Zerbitzu publiko eta doakoa da, lurraldeko ikus-entzunezkoen ekoizpena sustatzea helburu duena. Horretarako, era guztietako ikus-entzunezko produktuak erakartzen ditu eta arreta integrala eskaintzen die. Era berean, sektore hori bultzatzen dugu hainbat laguntza-lerrorekin, ekitaldiak babestuz eta sektoreko eragileekin hitzarmenak formalizatuz”, adierazi du Etxebarriak.

Bestalde, diputatu nagusiak nabarmendu duenez, “helburua da sektoreak Araban duen jarduera modu esponentzialean handitzea. Jakina, filmaketak eta ikus-entzunezko proiektuak ugaritu nahi ditugu, baina gure helburua Araban ikus-entzunezko industria indartsua sortzea da. Helburu hori Aldundiaren politika ekonomikoaren barruan kokatzen da, eta gure sektore tradizionalak indartzea du helburu, baina baita etorkizuneko jarduera berriak dibertsifikatzea eta bultzatzea ere”.

Bi erakundeen artean zehaztutako lankidetzarako eta koordinazio estrategikorako esparruak jarduera-ildo batzuk barne hartzen ditu, hala nola Gasteizen edo Araban egiten diren filmaketetara joatea eta horiei buruzko informazioa ematea; espazio publikoetan filmatzeko baimenak izapidetzeko lanak kudeatzea; filmatzeko espazioak bilatzen laguntzea eta tokiko ikus-entzunezko profesionalak hemen filmatzeko interesa duten ekoizleekin harremanetan jartzea.

Gainera, Vitoria-Gasteiz Araba Film Commissionek babesak eta beste finantzabide batzuk bilatzen lagunduko du; lurraldea sustatuko du ekitaldi, azoka eta beste kanal batzuetan; ikus-entzunezko sektorean tokiko talentua eta jarduera ekonomikoa babestuko ditu.
“Gaurkoan, gure ikus-entzunezkoen sektorearen aldeko hitzarmen hau sinatu dugu. Gasteiz eta Araba oso ondo kokatuta daude jada Estatuko eta nazioarteko filmaketen arloan.

Filmaketa-lanek jarduera ekonomiko garrantzitsua sortzen dute, eta horrek eragina du hainbat esparrutan, hala nola ostalaritzan, jatetxeetan eta tokiko zerbitzu osagarri ugaritan. Gainera, film bakoitza gure hiriaren eta lurraldearen erakusleihoa da, eta horrek esan nahi du bisitari gehiago daudela beren film edo telesail gogokoenetako eszenak filmatu dituzten tokiak ezagutu nahi dituztenak. Beraz, turismoa erakartzeko gune oso interesgarria da”, nabarmendu du.

Ramiro Gonzálezek azpimarratu duenez, “lan honen barruan, funtsezkoa da Gasteizko Udalarekin lankidetzan aritzea, Udalak ere helburu hori bera baitu. Lankidetza hori dagoeneko martxan dago, proiektuak erakartzeko eta horien garapena errazteko elkarrekin lan eginez. Eta gaur beste pauso bat eman dugu; pauso garrantzitsua, gainera”.

Gaur sinatutako akordioak 4 urteko indarraldia izango du, eta beste 2 urtez luzatu ahal izango da. Horren bidez, Zuzendaritza eta Jarraipen Batzordea sortuko da, hitzarmena sustatu duten erakunde bakoitzeko bi pertsonak osatua.